20 boıjetken «Astana arýy» baıqaýynyń fınalyna ótti (FOTO)
ASTANA. QazAqparat - 12 qarasha kúni Kongress-holl saraıynda «Astana arýy-2015» sulýlyq baıqaýynyń aqtyq syny ótedi. Uıymdastyrýshylardyń aıtýynsha, eń jasy 16 jastaǵy oqýshy men 23 jasqa deıingi stýdentter arasynan 20 boıjetken «Astana arýy» tájine «talasady».
«Astana-arýy-2015» baıqaýynyń bas júldesi men úsh ornyn ıelengen qyzdar «Qazaqstan arýy» jarysyna joldama alady. Aıta keterligi, 2008 jyldan beri elordanyń sulýyn tańdaıtyn jarys tsırk ǵımaratynda, ártúrli saýda oryndary men qonaq úılerde ótkizilip júrdi. Bıyl qala ákimdiginiń qoldaýymen sulýlyq jarysy Kongress-holl sahnasynda ótedi. Ádemi shoý uıymdastyrý úshin belgili qoıýshy rejısser Svetlana Grabovskaıany shaqyrdyq»,-deıdi osy baıqaýǵa oraı ótken baspasóz máslıhatynda «Astana arýy» konkýrsynyń dırektory Olga Radesh.
Al qoıýshy rejısser Svetlana Grabovskaıanyń aıtýynsha, ol qyzdardy tórt negizgi kezeń boıynsha sahnaǵa daıyndap jatyr. «Qyzdar konkýrs erejesine saı, tórt kezeń boıynsha sahnaǵa shyǵady. Aldymen ózderin tanystyrady, ekinshi kezeńde ulttyq áshekeılerdi taǵyp shyǵady. Úshinshi kezeńdi ázirge qupııa saqtaýdy jón kórip otyrmyn. Tórtinshi kezeńde qyzdarymyz ádemi keshki sán kóılekterin kórsetedi»,-deıdi qoıýshy rejısser.
Jalpy, bıyl «Astana arýy» konkýrsynyń kastıngine 200 boıjetken qatysqan. Sonyń ishinen iriktelgen 20 boıjetken kúnine 7-8 saǵattan, úsh apta boıy tynymsyz daıyndalyp jatyr eken.
