20 bala Astana ákiminiń bilim grantyna ıe boldy
ASTANA. QazAqparat - Astana ákimi Áset Isekeshev mektep túlekterine - jetimderge, múgedekterge, balalar úıleriniń tárbıelenýshilerine, kóp balaly otbasylardan shyqqan jáne ata-anasynyń qamqorlyǵynsyz qalǵan balalarǵa elordalyq JOO-larda oqý aqysyn tóleý úshin áleýmettik kómek kórsetý týraly kýálikter tabys etti, dep habarlaıdy ákimdik baspasóz qyzmetinen.
«Bul da memlekettiń, Prezıdentimiz Nursultan Nazarbaevtyń qamqorlyǵynyń bir belgisi ekendigin atap ótkenimiz jón. Elbasy árqashan da bilimdi ulttyń bolashaǵy jarqyn bolady deıdi. Bilimniń arqasynda biz básekege qabiletti, kúshti bolamyz. Bilim salasyn damytý - memlekettiń basymdyqtarynyń biri bolyp tabylady»,- dedi Áset Isekeshev.
Astana ákiminiń bilim granttary elordalyq eńbek naryǵyndaǵy suranysqa ıe mamandyqtar boıynsha bólinedi. Bul rette tehnıkalyq, pedagogıkalyq jáne medıtsınalyq mamandyqtarǵa basymdyq berilgen.
Aıta keteıik, 2008 jyldan bastap 268 túlek dıplom alǵan. 81 stýdent oqýyn jalǵastyrýda, sonyń ishinde 34 stýdent - S. Seıfýllın atyndaǵy QazATÝ, 13 - Qazaq ekonomıka, qarjy jáne halyqaralyq saýda ýnıversıtetinde, 8 - Medıtsına ýnıversıtetinde, 2- L.N. Gýmılev atyndaǵy EUÝ, 21 - Eýrazııa gýmanıtarlyq ınstıtýtynda, 1 - Astana ýnıversıtetinde, 2 - Tehnologııa jáne bıznes ýnıversıtettinde.
Oqý jyly qarsańynda 41 ótinish qabyldandy, sonyń ishinde 21-i respýblıkalyq grant boıynsha, 20 ótinish arnaıy komıssııamen qaraldy. Nátıjesinde jalpy somasy 7 210 000 teńgeni quraıtyn granttar bólindi.
Jalpy bıyl jergilikti bıýdjet esebinen 101 stýdentti oqytýǵa (oqýyn jalǵastyryp jatqan 81 stýdent + bıylǵy 20 stýdent) 38,9 mln teńge jumsaldy. Qala ákimdigi JOO basshylyqtarymen birlesip stýdentterdiń úlgerimin turaqty baqylaýǵa aldy. 
