20 aqpanǵa arnalǵan aýa raıy boljamy
ASTANA. QazAqparat - Qazaqstannyń basym bóliginde atmosferalyq aǵyndardyń ótýine baılanysty aýa raıy turaqsyz bolady. Keı jerlerde qar túsip, jel kúsheıip, boran soǵyp, jer kóktaıǵaqtanyp, tuman túsýi yqtımal, dep habarlaıdy «Qazgıdromet».
Jambyl oblysynda tuman túsip, kóktaıǵaq bolady, jel ekpini 23-28 m/s deıin jetýi múmkin. Shyǵys Qazaqstan oblysynyń keıbir jerlerinde de jel kúsheıedi. Pavlodar, Qaraǵandy, Aqmola, Qostanaı, Soltústik Qazaqstan oblystarynyń keı jerlerinde boran soǵady, tuman túsedi, kóktaıǵaq bolady, jeldiń kúshi 15-20 m/s jetedi. Almaty oblysynda da tuman túsip, kóktaıǵaq bolady, jel kúsheıedi. Ońtústik Qazaqstan, Atyraý, Aqtóbe, Qyzylorda, Mańǵystaý oblystarynda 15-22 m/s deıin jel kúsheıip, tuman túsip, kóktaıǵaq bolady. Batys Qazaqstan oblystarynyń jekelegen aýdandarynda tuman túsedi. Aldaǵy kúnderi ońtústik, ońtústik-shyǵys óńirleriniń jekelegen ózenderinde aýa temperatýrasynyń kóterilýine baılanysty birtindep muz erýi múmkin. Syrdarııa ózeninde, Ońtústik Qazaqstan, Jambyl, Almaty jáne Shyǵys Qazaqstan oblystarynyń keı ózenderinde sý deńgeıiniń terbelýi baıqalýy yqtımal.
