20-21 jasar eki aǵaıyndy jáne 16 jastaǵy jasóspirimnen quralǵan qylmystyq topqa tusaý salyndy - QR ІІM
ASTANA. 6 aqpan. QazAqparat - Almaty qalasynyń krımınaldyq polıtsııa qyzmetkerleri kóńil kóterý oryndarynyń birine jasalǵan qaraqshylyq shabýyl qylmysyn ashty.
Bul týraly búgin Astanada ótken brıfıngte QR ІІM resmı ókili Nurdildá Oraz málim etti.
28 qańtarǵa qaraǵan túni úsh qaskóı janjaldasyp jatqan sııaqty bolyp jabyq turǵan dámhananyń kúzetshisin aldap esikti ashqyzyp alady da, ony soqqyǵa jyǵyp, qol-aıaǵyn baılap tastaıdy. Sodan soń seıfti buzady da, ishinde jatqan 2,5 mln. teńgeni qoldy qylyp, oqıǵa ornynan izderin jasyrady. «Atqarylǵan sharalar barysynda qylmystyq topqa tusaý salyndy. Olar buryn sottalmaǵan 20 jáne 21 jasar eki aǵaıyndy men 16 jasar jasóspirim ekendigi anyqtalyp otyr. Qazir olardyń basqa da qylmystarǵa qatystylyǵy tekserilýde»,-dedi resmı ókil.
