2 jylda elde krıptovalıýtanyń aınalymyna baılanysty myńnan astam qylmystyq is tirkelgen

ASTANA. KAZINFORM – Onyń 60% — alaıaqtyq faktileri, 25% — krıptovalıýta aıyrbastaý pýnktteriniń zańsyz qyzmeti, al 15% — tsıfrlyq aktıvter arqyly qylmystyq tabysty zańdastyrý jaǵdaılary. Bul týraly ІІM baspasóz qyzmeti habarlady. 

Taraz qalasynda «Krıptovalıýta platformalaryn paıdalana otyryp jasalǵan qylmystardy anyqtaý, ashý jáne tergeý ádisteri» taqyrybynda forým ótti.

Іs-sharaǵa Іshki ister mınıstriniń orynbasary Sanjar Ádilov, Jambyl oblysy polıtsııa departamentiniń bastyǵy Qaısar Sultanbaev, Jambyl oblysy ákiminiń birinshi orynbasary Nurjan Kalenderov jáne quqyq qorǵaý organdarynyń basshylary qatysty. 

Sanjar Ádilov ekonomıkany tsıfrlandyrý jańa múmkindiktermen qatar jańa qaýipter de týyndatatynyn atap ótti. Sońǵy eki jylda Qazaqstanda krıptovalıýtanyń aınalymyna baılanysty myńnan astam qylmystyq is tirkelgen. Onyń 60% — alaıaqtyq faktileri, 25% — krıptovalıýta aıyrbastaý pýnktteriniń zańsyz qyzmeti, al 15% — tsıfrlyq aktıvter arqyly qylmystyq tabysty zańdastyrý jaǵdaılary. Azamattar men uıymdarǵa keltirilgen jalpy zalal 8 mıllıard teńgeden asty.

Mınıstrdiń orynbasarynyń aıtýynsha, basqa memlekettik organdarmen birlesip kıberqylmyspen kúresýge baǵyttalǵan júıeli sharalar kesheni iske asyrylyp jatyr. Antıfrod-ortalyǵy qurylyp, kúdikti ınternet-resýrstar men telefon nómirleri buǵattalyp jatyr. 

Bıylǵy jyldyń basynan beri 26 myńnan astam saıt jáne 64 mıllıon kúdikti qońyraý buǵattalǵan. Forým barysynda qatysýshylar tergeýdiń praktıkalyq ádisterin talqylap, tsıfrlyq izderdi anyqtaý tájirıbesimen almasty, sondaı-aq quqyq qorǵaý organdary qyzmetkerleriniń biliktiligin arttyrý máselelerin qarastyrdy. Kezdesý qorytyndysy boıynsha azamattardy jańa kıberqaýip túrlerinen qorǵaýǵa baǵyttalǵan usynystar ázirlendi.

Aıta ketelik UQK qazan aıynda qandaı qylmys tirkelgenin jarııalaǵan edi.