2 jylda 500-den astam klınıkalyq hattama qaıta qaralady
ASTANA. KAZINFORM - Densaýlyq saqtaý mınıstrligi 2025-2026 jyldary halyqqa medıtsınalyq kómektiń sapasyn, qaýipsizdigin jáne tıimdiligin arttyrý maqsatynda 500-den astam klınıkalyq hattamany ózektendirýdi josparlap otyr.
Atalǵan vedomstvo málimetinshe, 2013 jyldan bastap elde dıagnostıka, emdeýdi, medıtsınalyq ońaltýdy jáne pallıatıvtik kómekti qamtıtyn 1133 klınıkalyq hattama jumys isteıdi.
2018 jylǵa deıin klınıkalyq hattamalardy ázirleý, qaıta qaraý jáne saraptaý Ulttyq ǵylymı densaýlyq saqtaýdy damytý ortalyǵynyń (UǴDSDO) úılestirýimen biryńǵaı reglament boıynsha memlekettik tapsyrmanyń sheńberinde júzege asyryldy. Alaıda, qyzmettiń bul túrin básekelestik ortaǵa — beıindi medıtsınalyq qaýymdastyqtarǵa, ǵylymı-zertteý ınstıtýttaryna, ulttyq ortalyqtar men medıtsınalyq joǵary oqý oryndaryna bergennen keıin qujattardyń biryńǵaı úılestirilýi men sapasy joǵaldy.
Osylaısha, 2022 jyly ázirlengen 90 hattamanyń 46-sy (51%), 2023 jyly — 180-den 45-i (25%), al 2024 jyly-180-den 9-y (5%) maquldandy.
- Osyǵan baılanysty 2024 jylǵy jeltoqsanda Densaýlyq saqtaý mınıstrligi klınıkalyq hattamalardy ázirleý jáne qaıta qaraý qaǵıdalaryna ózgerister engizdi. Jańa redaktsııa barlyq kezeńdi ótkizý merzimin, aýrýlardyń basymdylyǵyn, KH qurylymy men mazmunyna qoıylatyn talaptardy retteıdi, sondaı-aq dıagnostıka men emdeýdiń negizgi jáne qosymsha ádisterine saralaýdy engizedi, - dep atap ótedi mınıstrlikten.
Sonymen qatar 2024 jyly 543 qoldanystaǵy klınıkalyq hattamaǵa, sondaı-aq eń kóp qoldanylatyn jáne resýrstardy qajet etetin 70 KH-ǵa aýqymdy revızııa júrgizildi. Taldaý nátıjeleri boıynsha 430 hattamany qaıta qaraý kestesi bekitildi: 2025 jyly – 230, 2026 jyly – 200. Árbir hattamaǵa jaýapty ǵylymı uıymdar men medıtsınalyq joǵary oqý oryndary bekitilgen.
2025 jylǵy 1 jeltoqsanǵa deıin qaǵıdalardy qosymsha jetildirý jónindegi jumys aıaqtalady, onyń ishinde:
- KH tıptik qurylymyn ornatý;
- medıtsınalyq qyzmetterdiń sapasy jónindegi birlesken komıssııanyń KH qaraý merzimderin reglamentteý;
- birikken komıssııa men Formýlıarlyq komıssııanyń arasyndaǵy dárilik zattar boıynsha usynymdardy ózara taný tetikteri;
- qymbat preparattar men qyzmetterdi engizý kezindegi bıýdjettik saldarlardy mindetti taldaý;
- KH ázirleýge jaýapty ǵylymı uıymdar men joǵary oqý oryndarynyń basshylary úshin KPI júıesin engizý.
Jańartylǵan klınıkalyq hattamalar durys emes nemese tıimsiz terapııamen baılanysty qaýipterdi azaıtýǵa kómektesedi jáne búkil elde emdeýdiń biryńǵaı ádisin usynady.
Aıta keteıik, esirtkige elikkenderdi emdeýdiń jańa klınıkalyq hattamasy ázirlenip jatyr.