2 jastaǵy qyzdy kúıdirip alǵan balabaqsha meńgerýshisi men tárbıeshi jazalandy
AQTÓBE. QazAqparat - Aqtóbe oblysy, Hromtaý aýdany, Bógetsaı aýylyndaǵy balabaqshada 2 jastaǵy Nuraı Ótegendi kúıdirip alǵan meńgerýshi men tárbıeshi jazalandy, dep habarlaıdy QazAqparat tilshisi.
Oqıǵa 3 naýryz kúni tirkeldi. Sol kúni 2 jastaǵy Nuraı Ótegen túski ýaqytta uıyqtap jatqan kezinde kereýetinen qulap ketken. Qulaǵan bala jylý batareıasyna qystyrylyp, aıaǵyn kúıdirip alady. Bul ýaqytta tárbıeshi balalardyń jatyn bólmesinde bolmaǵan. Arada 10 mınýt ótken soń kelip, búldirshinniń ata-anasyna habar bergen. Úıinde birer kún em alǵan balanyń densaýlyǵy nasharlap, tamaq ishpeı, tún uıqysy buzylǵan. Keıin onyń ata-anasy Nuraı Ótegendi aýdandyq aýrýhanada emdetip, dárigerlerdiń nusqaýymen oblystyq aýrýhanaǵa jatqyzady. Balabaqshadaǵy is boıynsha quqyq qorǵaýshylar tekserý jumystaryn bastady. Al Hromtaý aýdandyq bilim bólimi qyzmettik tekserýden soń qorytyndy shyǵardy.
«Balabaqsha meńgerýshisine qatań sógis berildi. Al tárbıeshi jumystan shyǵaryldy. Qazirgi ýaqytta qaýipsizdikti saqtaý maqsatynda balabaqshadaǵy batareıalardyń barlyǵy qorshaldy»,- dedi oblystyq bilim basqarmasynyń bas mamany Ámına Nurmanova.
Aıta keteıik, Nuraı Ótegenge dárigerler ekinshi dárejeli kúıik dıagnozyn qoıdy. Ol Aqtóbe oblystyq balalar aýrýhanasynda em qabyldap jatyr. Jaǵdaıy jaqsy.
