2 jasar qyzdyń ólimi: Shujyq jetkizýshige qatysty tekseris bastaldy
KÓKShETAÝ. QazAqparat- Býrabaı aýdanynda 2 jasar búldirshinniń shujyqtan kóz jumýy týraly beınejazbany teksere kele shujyq óndirýshi men jetkizýshi anyqtalyp, jospardan tys tekseris bastaldy, dep habarlaıdy QazAqparat tilshisi Aqmola oblysynyń qoǵamdyq densaýlyqty qorǵaý departamentine silteme jasap.
Departament məlimetinshe, epıdemıologııalyq zertteý kezinde aýrýdyń bastalýyna Býrabaı aýdanynyń Şýche qalasyndaǵy «Aqjelken» sýpermarketinen satyp alynǵan jartylaı súrlengen shujyq sebep bolǵany anyqtaldy. Ony balanyń ata-anasy aıtqan.
«Shujyqty otbasynyń barlyq músheleri (4 eresek jəne 3 bala) jegen. Alaıda ishek juqpasy balalarda ǵana órshigen. Zardap shekkenderdiń týystary shujyq óndirýshini naqty kórsete almady. Osyǵan oraı saýda úıindegi ártúrli óndirýshi shyǵarǵan shujyq ónimderinen 16 synama alynyp, zerthanaǵa jiberildi. Oǵan qosa, zerthanalyq tekserý nətıjesi shyqqansha saýda úıinde atalmysh shujyq túrin satýǵa tyıym salyndy. Sonymen birge, oblysta shujyq ónimderinen ýlaný oqıǵasy tirkelgen joq», - dep túsindirdi Aqmola oblysynyń qoǵamdyq densaýlyqty qorǵaý departamentiniń basshysy Azamat Dúısenov.
Sonymen qatar, zardap shekkenderdiń úılerinde sanıtarlyq-epıdemıologııalyq zertteý júrgizilip, ishek taıaqshasy jáne patogendi floradan 30 sý shaıyndysy alyndy.
«Qosymsha zertteý barysynda 23 qazan kúni saýda úıindegi beınejazbany tekserý kezinde shujyq ónimin óndirýshi men jetkizýshi anyqtaldy. Shujyq ónimderinen synama alý kezinde shujyqtyń bul túri saýdada bolǵan joq. Osyǵan oraı atalmysh shujyq ónimderin óndirýshige qatysty jospardan tys tekseris bastalyp, məlimetter óndirýshiniń turǵylyqty jeri boıynsha aýmaqtyq qoǵamdyq densaýlyqty qorǵaý departamentine jiberildi. Olar jospardan tys tekseris júrgizedi. Zerthanalyq zertteýler qorytyndysy shyqqan soń naqty aqparat usynamyz», - dep tolyqtyrdy Azamat Dúısenov.
Qazirgi kezde zardap shekken 2 bala stantsıonarda em qabyldap jatyr. Jaǵdaılary qanaǵattanarlyq. Epıdemııaǵa qarsy jəne aldyn alý boıynsha keshendi sharalar júrgizilip jatyr.
Aıta keteıik, 2018 jyldyń 17 qazanynda Býrabaıdaǵy aýdanaralyq kópbeıindi aýrýhananyń juqpaly aýrýlar bólimshesine ishek juqpasy syrqatymen 2016 jyly týǵan (2,4 jasar) búldirshin túsken bolatyn. Aqmola oblystyq balalar ınfektsıonısi teksere kele, balaǵa «asqynǵan mı qan aınylymynyń jetispeýshiligi, gastroenterokolıt tıpi boıynsha protrombın ıdeksi, botýlızm» dıagnozyn qoıdy. Búldirshin 20 qazan kúni saǵat 05:40-ta kóz jumdy.
