2 jasar qyz balabaqshadaǵy jylý batareıasyna kúıip qaldy
AQTÓBE. QazAqparat - Aqtóbe oblysy Hromtaý aýdanyndaǵy balabaqshada tótenshe jaǵdaı tirkeldi.
Eki jasar bala túski uıqy kezinde kereýetinen aýnap ketip, jylytý batareıasyna kúıip qalǵan, dep habarlaıdy QazAqparat tilshisi.
Aqtóbe oblysy Hromtaý aýdanyndaǵy Bógetsaı aýylynda turatyn Nuraı Ótegen qazir oblystyq aýrýhanada em qabyldap jatyr. Oqıǵa 3 naýryz kúni bolǵan. Sol kúni balanyń ákesi Erdibek Ospanovty balabaqshadaǵy tárbıeshi shaqyryp alyp, qyzynyń aıaǵy kúıip qalǵanyn aıtqan. Biraq alǵashqy medıtsınalyq kómek kórsetilmegen.
«Medbıkeni suraǵan edim, ony múlde shaqyrmaǵandaryn aıtty. Balanyń jarasyn tańbaı alyp júrý múmkin bolmaǵan soń medıtsınalyq beketke barǵan edik. Ol jerde dári-dármek tabylmady. Qyzym birneshe kún uıyqtamady, tamaq ishpedi. Sodan keıin Hromtaý aýdandyq aýrýhanasyna alyp bardym. Ol jerde kúıikti emdeıtin maman joqtyǵy aıtylyp, qyzym oblystyq aýrýhanaǵa jetkizildi»,- dedi Erdibek Ospanov.
Qazir 2 jastaǵy Nuraı Ótegenniń ákesi aýdandyq ishki ister departamentine aryz túsirdi. Onyń aıtýynsha, balany baqylamaǵan tárbıeshi áli jumys ornynda júr, tergeý mardymsyz júrip jatyr.
«Moraldyq-materıaldyq shyǵynnyń somasyn jazbadym, ony sot sheshedi. Maǵan aýdandyq bilim bóliminiń mamandary kelip, tárbıeshini keshirýdi suraǵan is-áreketteri batyp otyr. Jumys ýaqytynda kereýetten qulap, 15 mınýt jylap, jany aýyrǵan balama qaramaǵan tárbıeshi qyzmetinen ketýi tıis»,- deıdi E.Ospanov.
Aıta keteıik, isti oblystyq bilim basqarmasy da baqylaýda ustap otyr.
«Oqıǵa Bógetsaı aýylyndaǵy «Baldáýren» balabaqshasynda boldy. Kishkentaı qyz túski ýaqytta kereýetten qulap ketip, batareıaǵa qulaǵan. Sol jerde aıaǵy kúıip qaldy. Kúıik 2-shi deńgeıli. Jaǵdaıy jaqsy, oblystyq balalar aýrýhanasynda em qabyldap jatyr»,- dedi aımaqtyq bilim basqarmasynyń bas mamany Ámına Nurmanova.
Aıta keteıik, qazirgi ýaqytta Hromtaý aýdandyq bilim bólimi komıssııa quryp, istiń mán-jaıyn anyqtaý ústinde. «Qyzmettik tekserý aıaqtalǵan soń tárbıeshi mindetti túrde jazalanady. Sonymen qatar, mektepke deıingi mekemedegi qaýipsizdikti qamtamasyz ete almaǵan balabaqsha meńgerýshisi jaýapqa tartylady»,- dedi Ámına Nurmanova.
