2 jasar búldirshinniń ólimine baılanysty shujyq ónimderinen 16 synama alyndy
KÓKShETAÝ. QazAqparat - Aqmola oblysynda 2 jasar búldirshinniń shujyqtan ýlanyp qaıtys bolýyna baılanysty Şýchınsk qalasyndaǵy saýda úıleriniń birindegi shujyq ónimderinen 16 synama alyndy, dep habarlaıdy QazAqparat tilshisi oblystyq qoǵamdyq densaýlyqty qorǵaý departementine silteme jasap.
Vedomstvonyń málimeti boıynsha, epıdemıologııalyq zertteý kezinde balanyń ólimine Şýchınsk qalasyndaǵy saýda úıleriniń birinen satyp alynǵan jylqy etinen jartylaı súrlengen shujyq (kolbasa) jeýi sebep bolǵan.
«Alaıda, zardap shekkenderdiń týystary shujyqty óndirýshini kórsete almady. Osyǵan oraı saýda úıindegi ár túrli óndirýshi shyǵarǵan shujyq ónimderinen 16 synama alynyp, zerthanaǵa jiberildi. Oǵan qosa, úılerinde sanıtarlyq-epıdemıologııalyq zertteý júrgizilip, ishek taıaqshasy jáne patogendi floradan 30 sý shaıyndysy alyndy. Onyń nátıjesi áli shyqqan joq», dep túsindirdi Aqmola oblysynyń qoǵamdyq densaýlyqty qorǵaý departementiniń basshysy Azamat Dúısenov.
Eske sala keteıik, 2018 jyldyń 17 qazanynda Býrabaıdaǵy aýdanaralyq kópbeıindi aýrýhanasynyń juqpaly aýrýlar bólimshesine ishek juqpasy belgisimen 2016 jyly týǵan (2,4 jastaǵy) búldirshin túsken bolatyn.
Aqmola oblystyq balalar ınfektsıonısi teksere kele, balaǵa «asqynǵan mı qan aınylymynyń jetispeýshiligi, gastroenterokolıt tıpi boıynsha protrombın ıdeksi, Botýlızm?» dıagnozyn qoıdy.
Keıin búldirshin qazannyń 20-y kúni saǵat 05:40-ta kóz jumdy.
