2 tamyzdan keıin karantın sharalary jeńildeı me

NUR-SULTAN. QazAqparat – QR Bas memlekettik sanıtarlyq dárigeri Aıjan Esmaǵambetova karantınnen keıingi jaǵdaı qalaı órbıtini jóninde suraqqa jaýap berdi, dep habarlaıdy QazAqparat tilshisi.

«Eki aptalyq karantın ótti. Alda taǵy eki apta bar. Dál osy karantındik sharalar qalaı júrgizilse, aldaǵy sharalar da, karantındi kúsheıtý nemese jeńildetý osyǵan tikeleı baılanysty bolady» - dep jaýap berdi A. Esmaǵambetova Ortalyq kommýnıkatsııalar qyzmetinde ótken onlaın brıfıngte.

Onyń aıtýynsha, vıtse-premer tóraǵalyq etetin vedomstvoaralyq komıssııa karantın sharalaryn jeńildetýdiń túrli nusqasyn qarastyryp jatyr.

Buǵan deıin spıker eki aptalyq karantınde syrqattar ósiminiń bolmaǵanyn málimdegen edi.

«23 shildede respýblıka boıynsha koronavırýs ınfektsııasynyń 76 799 jaǵdaıy tirkelgen. Onyń ishinde 48 202 naýqas nemese naýqastardyń 63 paıyzy emdelip shyqty. Syrqattaný táýligine 1 600-1 700 jaǵdaı deńgeıinde turaqtandy. 5 shildede qatań shekteý sharalary engizilgen sátten bastap eki aptada respýblıkada koronavırýstyń 21 532 jaǵdaıy tirkeldi. Aldyńǵy eki aptamen salystyrǵanda syrqattaný bir deńgeıde qalyp otyr», - dedi A. Esmaǵambetova.