2 sheteldik kompanııa jolǵa bólingen 28 mlrd teńgeni offshorǵa shyǵarǵan

NUR-SULTAN. QazAqparat – Sybaılas jemqorlyqqa qarsy is-qımyl agenttigi Aldyn alý qyzmetiniń basshysy Saıan Ahmetjanov jolǵa bólingen aqshany offshorlyq aımaqqa shyǵaryp áketýdiń shemasy týraly málimet berdi, dep habarlaıdy QazAqparat tilshisi.

«Sybaılas jemqorlyqtyń taǵy bir baǵyty Úkimet bergen qaryzdy ıgerý kezinde kezdesedi. Úkimettik qaryz bıýdjet arqyly bólinedi. Aqsha jymqyrý algorıtmi mynadaı. Jol-qurylys jumystaryn júrgizýge baılanysty ótetin tenderde sheteldik merdiger kompanııa shekten tys tómen baǵa usynyp, konkýrs jeńimpazy atanady. Mysaly, «SPIK AKKORD» ashyq aktsıonerlik qoǵamy tender kezinde baǵany 38 paıyz túsirgen. Bul tenderde jarııalanǵan joba qunynyń úshten birinen artyq degen sóz. Mundaı baǵamen salynatyn joldyń sapasy men tıimdiligne qatysty kúmán týyndaıdy. Tipti mundaı aqshaǵa jol salyp shyǵýdyń ózi ekitalaı. Kelisimshart bekitilgennen keıin merdigerge kúmándi bank usynǵan kepildik boıynsha avans beriledi. Mysaly, Soltústik Kıprde tirkelgen Fortress Bank offshorlyq aımaqta ornalasqan. Keıin avans kólemi ulǵaıtylady. Óıtkeni normatıvtik shart joq. Osyny paıdalanǵan merdiger sharttaǵy mindetin qasaqana oryndamaıdy deýge bolady. Osylaısha kelisimshart buzylady», - deıdi agenttik ókili.

Budan keıin sheteldik merdiger Qazaqstan aýmaǵynan izin jasyryp úlgeretin kórinedi.

«Budan keıin sheteldik merdiger kompanııa Qazaqstan aýmaǵynan shyǵyp ketedi. Al quzyretti komıtet sot tóreligine júginedi. Taldaý kezinde osyndaı eki sheteldik kompanııa anyqtaldy. Olar jeńip alǵan tenderdiń jumystaryn qajetti deńgeıde oryndamaı, Qazaqstan bıýdjetine 28 mlrd teńgeden astam shyǵyn keltirdi», - dedi Saıan Ahmetjanov.