2 protsenttik ıpotekany aýqattylar alyp ketpeı me

ASTANA. QazAqparat - Prezıdenttiń tapsyrmasy boıynsha ataǵan turǵyn úı nesıesi kópbalaly, múgedek balasy bar men tolyq emes otbasylarǵa ǵana berilýi shart. QR Indýstrııa jáne ınfraqurylymdyq damý mınıstrligi men Turǵyn úı qurylys jınaq banki atalǵan ıpotekanyń negizgi sharttaryn jarııalady, dep xabarlaıdy QazAqparat tilshisi.

Qurylys jáne turǵyn úı-kommýnaldyq sharýashylyq isteri komıtetiniń tóraǵasy Marxabat Jaıymbetovtyń aıtýynsha, jeńildetilgen ıpotekany baı-aýqatty adamdar alyp ketpes úşin 2 protsenttik ıpoteka boıynsha jalaqynyń shekti mólsheri bekitildi.

«Qazir búkilin baılar alyp ketedi degen suraqtar da bar. Baılyǵy kóp azamattar alyp ketpes úshin bir adamǵa shaqqanda mınımaldy jalaqy - 42 500 teńgeden aspaýy kerek. Mysaly, otbasyda eki adam bolsa, olardyń aılyq tabysy 85 500 teńgeden aspaýy qajet. Al alty adam bolsa, 255 000 myń teńgeden aspaýy tıis», - dedi M.Jaıymbetov búgin Astanadaǵy kópbalaly analarmen bolǵan kezdesýde.

Aıta keteıik, búgin QR Indýstrııa jáne ınfraqurylymdyq damý mınıstrligi kópbalaly otbasylarǵa 2 protsenttik ıpotekany berý sharttaryn jarııalady. Turǵyn úı qurylys jınaq bankinen 8 mıllıon teńge qaryzǵa alynsa, alǵashqy 8 jylda aı saıyn 42 000 teńgeden tóleý kerek. Al odan keıingi 11 jylda atalǵan soma 27 000 teńgege deıin tómendeıdi.

«Jeńildetilgen baspana nesıesine jańa páter, bolmasa, úı satyp alýǵa bolady. Jyldyq mólsherlemesi - 2 protsent. Ol 19 jylǵa beriledi. Sosyn 10 paıyz kóleminde alǵashqy jarna salý qajet. Endi, alǵashqy jarnaǵa aqsha joq degen másele týyndaıdy. Máselen, 10 mıllıon teńgeni qaryzǵa alsań, 1 mıllıon teńge kóleminde alǵashqy jarna qajet. Biz bul máselege bylaı sheshýdi kózdep otyrmyz. Ákimdikter beretin turǵyn úı kýálikteri arqyly, bolmasa, iri kásiporyndardyń kómegimen alǵashqy jarnany alýǵa bolady. Máselen, Astana qalasy turǵyn úı kýálikterine 2 mıllıardtan astam qarjy bólemiz dep otyr. Sonyń kómegimen alýǵa bolady», - deıdi M.Jaıymbetov.

Komıtet basshysynyń sózine qaraǵanda, jeńildetilgen kredıttiń eń joǵary somasy - 15 mıllıon teńge alynsa, ol otbasynyń tabysy 104 250 teńge bolýy qajet. Al 6 mıllıon teńgeniń qaryzyna 56 850 teńgeniń jalaqysy kerek.

«Mysaly, 6 mıllıon teńgeniń nesıesin alsańyz, onda alǵashqy 8 jylda aı saıyn 31 600 teńgeni tóleısiz. Odan keıingi 11 jylda 18 988 teńge tólep otyrý qajet. Buǵan tórt baladan kóp otbasylar qatysa alady. Sosyn múgedek balalary bar otbasylar men tolyq emes otbasylarǵa alýǵa múmkindik bar», - dep atap kórsetti M.Jaıymbetov.

Osyǵan deıin kópbalaly otbasylarǵa arnalǵan ıpotekanyń aı saıynǵy tólemaqysy týraly jazdyq.