2 paıyzdyq ıpoteka qashan berile bastaıdy
NUR-SULTAN. QazAqparat - «Turǵynúıqurylysjınaqbanki» AQ tóraıymy Lázzat Ibragımova «Baqytty otbasy» baǵdarlamasy qashan bastalatynyn aıtty, dep habarlaıdy QazAqparat tilshisi.
Indýstrııa jáne ınfraqurylymdyq damý mınıstri Roman Sklıardyń eseptik kezdesýinde «Turǵynúıqurylysjınaqbanki» AQ tóraıymy 2 paıyzdyq ıpoteka qashan berile bastaıtynyn málim etti.
«Baqytty otbasy» baǵdarlamasy osy aıdyń sońynda nemese kelesi aıdyń basynda iske qosylady. Ol úshin alǵashqy qarajat bólindi. Іlki joba aıasynda Almaty qalasynyń ákimdigi bizge 3 mlrd teńge bólgen bolatyn. Búginge deıin 98 almatylyq otbasy osy 2 paıyzdyq ıpotekamen úı aldy. Buǵan qosa jergilikti ákimdik 1 mln teńgege deıin turǵyn úı sertıfıkattaryn tabystady. Almaty qalasy boıynsha taǵy 233 ótinish tústi. Ol ótinishtiń bári maquldandy», - deıdi bank basshysy.
Lázzat Ibragımova qalǵan oblystarda mundaı nesıe aldaǵy 2 aptanyń ishinde qolǵa alynatynyn aıtty.
«Qarjy mınıstrliginen bizdiń bank esebine qarjy túskenin kútip otyrmyz. Qarjy túsken kúni-aq «Baqytty otbasy» baǵdarlamasy boıynsha baspana bere bastaımyz. Bul istiń meılinshe ashyq júrýin qamtamasyz etemiz. Páter alýshy adammen kelisimshart jasaý kezinde ıpoteka ıesinen aty-jónin baǵdarlama qatysýshysy retinde tizimge engizýge kelisim alamyz. Osynyń arqasynda qaı oblysta kimniń 2 paıyzdyq ıpoteka alǵanyn bári kórip otyrady», - dedi bank tóraıymy.
