2 myńnan astam ota jasaǵan podpolkovnık

ASTANA. QazAqparat - Kórinbeıtin maıdannyń jaýyngerleri - áskerı hırýrgterdiń kúrdeli mindetterdi oryndaıtyny sózsiz, dep habarlaıdy Qr Qorǵanys mınıstrliginiń baspasóz qyzmeti.

«Dárigerdiń, onyń ishinde hırýrgtiń jumysy psıhologııalyq, fızıkalyq kúshti, tózimdilikti talap etedi. Mysaly, adam taǵdyry qyl ústinde turǵan kezde hırýrgke ony qutqaryp qalý úshin 8-10 saǵattyq ota jasaýǵa týra keledi», - deıdi Bas áskerı klınıkalyq gospıtal bastyǵynyń ǵylymı-hırýrgııalyq qyzmet jónindegi orynbasary, jetekshi hırýrg, podpolkovnık Erjan Smaıyl.

Áskerı hırýrgtardyń jumysy bir ǵana qalamen shektelip qalmaıdy, qajet bolǵan jaǵdaıda brıgadalar Qazaqstannyń eń qashyq degen óńirine de barýǵa daıyn.

«Birde biz jedel shaqyrýmen batysqa bardyq. Sol jerge jetkende bir adam úshin tutas bir dárigerlik brıgadanyń osynsha qashyqtyqtan ushyp kelgenine tań qalǵan bolatyn. Nátıjesinde, biz sol jerde eki ota jasadyq. Sosyn patsıentti Astanaǵa jetkizdik. Sol jerde taǵy bir patsıentke eki kúrdeli ota jasap, biz onyń ómirin saqtap qaldyq», - deıdi Erjan Smaıyl. Osy oqıǵadan soń ol «Jaýyngerlik erligi úshin» medalimen nagradtaldy.

Áskerı dárigerdiń qyzmet jyldarynda bul sııaqty oqıǵalar az kezdesken joq. Erjan Smaıyl áskerı dárigerlerdiń jumysy, eń aldymen, Otan qorǵaýshylaryna arnalǵanyn aıtady. «Eger baqytsyz jaǵdaı oryn ala qalsa, olar áskerı dárigerlerdiń kómekke keletinine, qutqarý úshin qoldan kelgenniń bárin jasaıtynyna senimdi bolýlary kerek»,-deıdi Bas áskerı klınıkalyq gospıtal bastyǵynyń ǵylymı-hırýrgııalyq qyzmet jónindegi orynbasary.