2 myńnan astam kásiporyn Biryńǵaı jınaqtaýshy zeınetaqy qorymen kelisimshart jasasty
ASTANA. QazAqparat - Qazirgi kúni Biryńǵaı jınaqtaýshy zeınetaqy qorymen kelisimshart jasasqan kásiporyndardyń sany 2 myńnan asyp otyr.
Bul týraly búgin «Áleýmettik qorǵaýdan - áleýmettik órleýge» atty 3-shi halyqaralyq ǵylymı-tájirıbelik konferentsııasy barysynda QR Eńbek jáne halyqty áleýmettik qorǵaý mınıstri Tamara Dúısenova málim etti.
«Búgingi tańda Biryǵaı jınaqtaýshy zeınetaqy qorymen 2 myńnan astam kásiporyn kelisimshart jasasyp, 150 myńnan astam jumysshynyń jeke zeınetaqy esepshottaryna 2,5 mlrd. teńge aýdaryldy», - dedi mınıstr.
Onyń atap ótýinshe, zeınetaqy jınaqtarynyń artýyn qamtamasyz etý maqsatynda aǵymdaǵy jyldyń qańtarynan bastap, balasy 1 jasqa tolǵanǵa deıin onyń kútimine baılanysty eńbek demalysyna shyqqan jumys isteıtin áıelderge mindetti zeınetaqy jarnalaryn sýbsıdııalaý engizildi.
«Qazirgi ýaqytta 84 myńnan astam áıel osy quqyqtaryn paıdalanyp, olardyń esepshottaryna respýblıkalyq bıýdjetten 1 mıllıardtan astam teńge aýdaryldy», - dedi T.Dúısenova.
