2 myńnan astam elektr baǵan qulady: Arys, Kentaýda jaǵdaı qalpyna keldi
TÚRKІSTAN. QazAqparat - Túrkistan oblysynda aýa raıynyń kúrt ózgerip, tolassyz jaýǵan jaýyn-shashynnyń arty burqasyn daýyl men qarǵa ulasyp, saldarynan Báıdibek, Otyrar, Ordabasy aýdany men Kentaý jáne Arys qalasynyń keıbir eldi mekenderi ishinara jaryqsyz qalǵan edi. Zardap shekken Arys pen Kentaý qalasynda jaǵdaı turaqtaldy. Kentaý qalalyq jylý elektr stansasy iske qosylyp, elektr jelileri jóndeldi. Bul týraly QazAparat ákimdiktiń baspasóz qyzmetine silteme jasap habarlaıdy.
Al, qalǵan úsh aýdanda elektr jelilerin qalpyna keltirý jumystary áli de jalǵasýda. Aýa raıynyń qolaısyzdyǵynan elektr symdary úzilip, 2 myńnan astam elektr baǵan qulaǵan. 20 myńnan astam abonent jaryqsyz qalǵan.
«Sırek kezdesetin qubylys. Óte qatty jańbyr, jel, muz, aıaz. Saldarynan oblysta 2 myńnan astam elektr baǵanalary qulady. Soǵan baılanysty is-shara jasaýymyz kerek»,-dedi oblys ákimi Ómirzaq Shókeev apparat otyrysynda.
Tabıǵattyń tosyn minez tanytýynan oryn alǵan apatty jaǵdaıǵa baılanysty shtab qurylyp, máseleni oblys ákimi Ómirzaq Shókeev óz baqylaýyna alǵan bolatyn. Oblys basshysy zardap shekken aýdan ákimderine qalpyna keltirý jumystaryna atsalysýdy tapsyrdy.
Jıynda sóz alǵan «Ońtústik Jaryq Tranzıt» kompanııasynyń basshylyǵy Ordabasy aýdanyndaǵy jaǵdaı jaqyn arada turaqtalatynyn jetkizdi. Al, Otyrar men Báıdibek aýdandarynda qaıta qalpyna keltirý jumystary bir aıǵa sozylmaq.
«Bir aı degendi estimeıtin bolaıyn. Bir aptanyń ishinde bárin ornyna keltirý kerek»,-dep kesip aıtty Ómirzaq Estaıuly.
Sońǵy eki táýlikten kebir tabıǵat apatynan bolǵan jaǵdaı boıynsha qalypqa keltirý jumystary kúni-túni júrgizilip jatyr. Oqıǵa oryndarynda jaryq berýshi kompanııanyń 20-dan astam brıgadasy men 100-den astam adamy, 30 tehnıkasy jumyldyrylǵan.
