2 myńnan astam bala qosymsha járdemaqy alady – Eńbek mınıstri

NUR-SULTAN. QazAqparat – 7 jastan 16 jasqa deıingi balalardy múgedektik toptary boıynsha bólý qarastyrylyp otyr. Bul týraly búgin Májiliste zań jobasyn tanystyrý barysynda QR Eńbek jáne halyqty áleýmettik qorǵaý mınıstri Serik Shapkenov málim etti, dep habarlaıdy QazAqparat tilshisi.

Aıta keteıik, búgin «Qazaqstan Respýblıkasynyń keıbir zańnamalyq aktilerine azamattardyń jekelegen sanattaryn áleýmettik qorǵaý máseleleri boıynsha ózgerister men tolyqtyrýlar engizý týraly» zań jobasy tanystyryldy.

«Ómir súrý men densaýlyqtyń qyzmet etýiniń, shektelýiniń halyqaralyq synyptamasyna sáıkes 7 jastan

16 jasqa deıingi balalardy múgedektik toptary boıynsha bólý kózdeledi. Bul shara balalar syrqatynyń aýyrlyq dárejesine baılanysty járdemaqy mólsherin saralanǵan túrde belgileýge múmkindik beredi. Bul rette, járdemaqy mólsheri 16,7 paıyzdan 37%-paıyzǵa deıin ulǵaıtylady. Jańashyldyq 31 myńnan astam múmkindigi shekteýli balaǵa qatysty bolady», - dedi mınıstr.

Onyń aıtýynsha, bul norma Baıqońyrda turatyn múgedek balalarǵa beriletin arnaýly memlekettik járdemaqy mólsherine de oń áserin tıgizedi. Osy oraıda 207 bala qamtylady.

Budan bólek mınıstr múgedektigi boıynsha jáne asyraýshysynan aıyrylý jaǵdaıy boıynsha járdemaqylardy bir mezgilde alý quqyǵyn berý tetigine toqtaldy.

«Bul asyraýshysynan aıyrylǵan jáne quramynda múgedek balalary bar otbasylardyń tabys deńgeıin arttyrýǵa múmkindik beredi. Atalǵan norma engizilgen kezde 2 myńnan astam bala múgedektigi boıynsha járdemaqymen qosa asyraýshysynan aıyrylý boıynsha járdemaqy alatyn bolady. Qazirgi ýaqytta olar tańdaýy boıynsha járdemaqynyń bir túrin ǵana alyp otyr.