2 myńnan astam atyraýlyq kásipkerdiń quqyǵy qorǵaldy

ATYRAÝ. QazAqparat – Atyraý prokýratýrasy 2 myńnan astam kásipkerdiń quqyǵyn qorǵady. Memlekettik organdardyń 300 astam zańsyz akti men 253 negizsiz tekserýdiń kúshi joıyldy, dep habarlaıdy QazAqparat.

Atyraý qalasynyń prokýratýrasynan málim etkendeı, bıylǵy úshinshi toqsanda 2 100 astam kásipkerdiń quqyǵy qorǵalyp, tórt problemalyq másele sheshimin tapqan.

«Kásipkerlerdiń quqyqtaryn qorǵaý – prokýrorlyq qadaǵalaýdyń basym baǵyttarynyń biri. Osyǵan oraı Atyraý qalalyq prokýratýrasy Memleket basshysynyń tapsyrmasyn oryndaý maqsatynda kásipkerlerdiń quqyqtaryn qorǵaý úshin birqatar sharalardy iske asyrdy. Atap aıtqanda, «Azamattarǵa arnalǵan úkimet» memlekettik korporatsııa Atyraý oblysy boıynsha fılıalyna qatysty shaǵyn kásipkerlik sýbektilerin alǵashqy tirkeýden zańsyz bas tartý tájirıbesi toqtatyldy. Zańǵa sáıkes bıznes sýbektilerin tirkeýden bas tartýǵa tyıym salynady. Memlekettik organdardyń 300 astam zańsyz aktisi men 253 negizsiz tekserýdiń kúshi joıyldy», -dedi qalalyq prokýratýradan.

Máselen, Atomdyq jáne energetıkalyq qadaǵalaý men baqylaý komıteti Atyraý oblysy boıynsha aýmaqtyq departamentiniń qyzmetkeri kásipkerlik sýbektisine qatysty tekserýdi tirkemeı, qujattardy suratyp, aıǵaq berýge shaqyrtqany anyqtalǵan. Prokýrordyń qaýlysy negizinde zańsyz tekserý júrgizý deregi boıynsha laýazymdy tulǵa QR Ákimshilik quqyqbuzýshylyq kodeksiniń 175-babymen ákimshilik jaýapqa tartylǵan.

Jyl basynan beri kásipkerlerdiń quqyqtaryn óreskel buzǵan 11 laýazymdy tulǵa tártiptik, 5 tulǵa ákimshilik jaýapqa tartý sharasy qoldanylǵan.

Eske sala ketelik, budan burynAtyraý oblysynda 1 myńnan astam jumysshynyń 586 mln teńge jalaqy qaryzy ótelgenin jazǵan edik.