2 myńnan asa medıtsına qyzmetkeri «Birgemiz» qorynan 50 000 teńgeden aldy
NUR- SULTAN. QazAqparat -Koronavırýspen kúresýge jumyldyrylǵan 2 myńnan asa medıtsına qyzmetkeri Elbasy bastamasymen qurylǵan «Birgemiz» qorynan 50 000 teńgeden aqshalaı tólem aldy. Osy maqsatqa demeýshilik qarajattan 100 mıllıon teńgeden astam qarajat bólindi, dep habarlaıdy QazAqparat.
Qor tóraǵasy Rýslan Sakeevtyń málimetinshe, birjolǵy tólemdi búgin elorda men Almatydaǵy 29 medıtsınalyq mekemede jumys isteıtin 2112 aqhalatty alǵan.
«Memleket basshysy áleýmettik jaǵdaıy tómen turǵyndarǵa jáne búginde koronavırýs indetimen kúreste aldyńǵy shepte júrgen dárigerlerge qoldaý kórsetý úshin buryn-sońdy bolmaǵan biregeı sheshim qabyldady. Elbasy tapsyrmasy boıynsha «Birgemiz» qory da Nur Otan partııasynyń qoldaýynyń arqasynda osy baǵyttaǵy jumystardan tys qalyp otyrǵan joq. Kúni keshe ǵana biz 23 qalanyń 150 myńnan astam muqtaj otbasyna 50 teńge kóleminde birjolǵy aqshalaı kómek berýdiń birinshi kezeńin bastadyq. Sonymen qatar, indet juqtyrǵandardyń basym bóligi Nur-Sultan men Almaty qalalarynda ekenin bilesizder. Osy qalalardyń medıtsına qyzmetkerleri qazirgi tańda kúni-túni jumys isteýde. Olardyń otbasylaryn kórýge, tipti, tynyǵýǵa da murshalary joq. Sondyqtan biz olarǵa qazaqstandyqtardyń densaýlyǵyna degen qamqorlyǵy úshin rızashylyǵymyzdy bildirip, «Birgemiz» qorynan qarjylaı kómek berý arqyly qoldaý kórsetkimiz keledi», - dedi Rýslan Sákeev.
Al sol kezde dárigerler áleýmettik jelilerde ózderiniń áserlerimen bólisip jatyr.
«Jan-jaqty qoldaý kórsetkenderińiz úshin raqmet! Bul bizdiń rýhymyzdy kóterip, jigerlendiredi! Meniń Qazaqstanym BІRGE barlyq qıyndyqtardy jeńedi dep senemin!!! Biz birgemiz!!!», - dep jazdy elordalyq №3 kópbeıindi balalar aýrýhanasynyń ınfektsıonıst-dárigeri Aınýr Omarova.
«Qazaqstannyń barlyq medıtsına qyzmetkerleri atynan men Elbasymyz Nursultan Ábishuly Nazarbaevqa el úshin osyndaı qıyn-qystaý kezińdegi qamqorlyǵy men qoldaýy úshin alǵysymdy bildiremin. Biz birgemiz!», - dep atap ótti psıhıkalyq densaýlyq ortalyǵynyń bas meıirbıkesi Gúlnar Altynbekova
«Qazirgi ýaqytta medıtsına qyzmetkerlerine materıaldyq, moraldyq qoldaý kórsetip otyrǵan halqyma, Elbasyna, «Nur Otan» partııasyna, «Birgemiz» qoǵamdyq qoryna myń alǵys bildirgim keledi. Biz birgemiz! Birge bolsaq, bárin jeńemiz!»,- dep jazdy №3-shi kópbeıindi balalar aýrýhanasynyń dárigeri Gúlmıra Nurtazına.
Buǵan deıin 150 myńnan astam muqtaj otbasy da «Birgemiz» qorynan 50 myń teńgeden aqshalaı kómek alatyny aıtylǵan edi. Alǵashynda qor qarajatyn 100 myń muqtaj azamatqa taratý josparlanǵan. Áıtse de, óńirlerden túsken ótinishter sany aıtarlyqtaı ósip, al partııanyń onlaın resýrstaryna kómek surap habarlasýshylar sany eki esege artty. Sondyqtan, Elbasynyń tapsyrmasy boıynsha QR Prezıdentiniń bastamasymen qolǵa alynǵan «Biz Birgemiz» aktsııasynyń aıasynda, birinshi kezeńde qarjylyq qoldaýdy 150 myńnan asa muqtaj azamatqa kórsetý týraly sheshim qabyldandy.
«7,6 mıllıard teńge qarajat aımaqtyq qorlardyń esebine tústi. Aqsha sol jaqtan kómek alýshylardyń banktik esep-shottaryna aýdarylady. Bular negizinen karantın qıyndyqtaryn kóbirek shegip jatqan 23 iri qalanyń turǵyndary. Ákimder men áleýmettik qorǵaý organdary usynǵan kómek alýshylar tizimderinde tabys deńgeıi eń tómen áleýmettik álsiz toptardan quralǵan azamattar qamtylǵan. Onyń ishinde az qamtylǵan jáne kópbalaly otbasylar, muqtaj múgedek jandar, múmkindigi shekteýli bala tárbıelep otyrǵan otbasylar, eń tómengi zeınetaqy alatyn jáne áleýmettik jaǵynan álsiz topqa kiretin zeınetkerler, jetim balalar, UOS-nyń ardagerleri men olarǵa teńestirilgen tyl eńbekkerleri bar» - dedi Rýslan Sákeev.
Sonymen qatar, ol materıaldyq kómekti ekinshi deńgeıdegi bankter arqyly jeke tulǵalardyń kartochkalaryna nemese aǵymdaǵy esepshottaryna aýdarý kezinde odan komıssııa alynbaıtynyn aıtty. Sondaı-aq, bul qarajattyń nesıeleri boıynsha qaryzy bar azamattardyń bereshegin óteý úshin ustalyp qalmaýy da qarastyrylǵan.
Jalpy «Birgemiz» qoǵamdyq qorynyń esepshotyna 18 mlrd teńgege jýyq qarjy tústi. «SQ-Farmatsııa» úkimettik operatorymen Nur-Sultan, Almaty jáne Shymkent qalalary turǵyndarynyń áleýmettik álsiz toptaryna tegin taratý úshin 5 mıllıon maska satyp alý týraly shartqa qol qoıyldy. Jınalǵan qarajat jáne óńirler boıynsha bólingen kómek týraly aqparatty baqylap otyrý úshin qor birgemiz2020.kz resmı saıtyn ashty.
