2 myńǵa jýyq bala Respýblıkalyq marafonda qalaı júgirip ótti
Balalar jyly jáne Kentaý shaharynyń qala kúni merekesine oraı uıymdastyrylǵan jarysqa elimizge tanymal sportshylar kelip, balalarǵa salaýatty ómir saltyn ustanýdyń mańyzy men artyqshylyǵyn túsindirdi.
Іs-sharaǵa eki myńǵa jýyq jas sportshy qatysty. 8 - 10 jas aralyǵyndaǵy balalar 500 metrge, 11 -13 jastaǵylar 1000 metrge, 14 - 16 jastaǵy jasóspirimder 2000 metrge júgirdi.
Marafonǵa qatysqan egizder Zarına men Karına da arnaıy medalǵa ıe boldy. 8-synyp oqıtyn olar búginge deıin birshama oblystyq jáne respýblıkalyq jarystardyń jeńimpazy atanǵan.
«Marafonnyń bolatynyn estigen boıda daıyndyqty bastadyq. Úıde de sportpen shuǵyldanamyz. Úıirmege qatysamyz. Sport bizdiń aınymas serigimiz», - deıdi Zarına Mamırhanova.
Marafon qorytyndysynda úzdikter arnaıy marapattarǵa ıe boldy. Solardyń ishinde 9 jastaǵy Aızere Meńgelbekova da bar. Shymkent qalasynan arnaıy kelgen Aızere birinshi oryndy jeńip aldy. Endigi jerde Túrkistan qalasynda ótetin halyqaralyq jarysqa qatysyp, baq synaıtyn bolady.
Al 7 jasar Nurıslam Qalybaı marafon qatysýshylarynyń sanatyna jatpasa da, qyzyǵýshylyqpen qatysty. Ol qarsylastarynan qalyp qoıǵanymen, jigerlik tanytyp, 500 metrdi márege deıin júgirip keldi. «Júldege ilinbegenmen, jarysqa qatysqanyma qýanyshtymyn. Alda taǵy jarystarǵa qatysyp qalaı da júlde alamyn», - deıdi ol.
Marafon sońynda qala ákimi Jandos Tasov pen oblystyq dene shynyqtyrý jáne sport basqarmasynyń bólim basshysy Aıtmahametáli Berdashev jeńimpazdardy quttyqtap, medaldar tabys etti. Al jeńis tuǵyrynan kóringen júldegerlerge halyqaralyq jarystarǵa joldama berildi.
Іs-shara qala kúni merekesine arnalǵan kontserttik baǵdarlamamen jalǵasty.
