2 myńǵa jýyq adam Baıqońyrdan Qazaqstannyń basqa aımaqtaryna kóshe almaı otyr

Búgin QR Parlamenti Májilisinde «QR men RF arasyndaǵy «Baıqońyr» keshenin tıimdi paıdalaný jónindegi yntymaqtastyqty damytý týraly kelisimdi ratıfıkatsııalaý týraly» zań jobasyn talqylaý barysynda depýtat Ýálıhan Qalıjan osylaı málim etti, dep habarlaıdy QazAqparat.

«Qolda bar málimetterge qaraǵanda, 1995 jyldan beri Baıqońyr qalasyndaǵy Qazaqstan azamattary óz úılerin jekeshelendire almaı keledi eken. Sonymen birge, Qazaqstan aýmaǵyndaǵy Baıqońyrda ózimizdiń zańdarymyz júzege aspaı otyrǵanyna qatysty mysaldar da jetkilikti. Máselen, Baıqońyrdaǵy zeınet jasyndaǵy 1 myń 900 adam jáne Qorǵanys mınıstrliginde, Іshki ister mınıstrliginde, Ulttyq qaýipsizdik komıtetinde ár jyldary qyzmetter atqarǵan 91 adam da Qazaqstannyń basqa aımaǵyna, ózge qalalarǵa kóshkisi keledi eken. Bul maqsatqa 1,5 mlrd. teńgege jýyq qarajat qajet bolatyny da kórsetilipti. Degenmen, áli kúnge bundaı problemalar oń sheshimin tappaı otyr», dedi Ý. Qalıjan.

Depýtat bundaı jaǵdaıda eldiń qarapaıym azamattarynan bastap, uzaq jyldar otanǵa qyzmet etken áskerı sala mamandarynyń quqyqtary da taptalyp otyrǵanyn atap ótti.