2 myń shaqyrymnan astam ınjenerlik jeliler jóndeledi - BQO ákimi

ASTANA. QazAqparat – Bıyl Batys Qazaqstan oblysynda 2 myń shaqyrymnan astam ınjenerlik jeliler jóndeledi. Bul týraly ortalyq kommýnıkatsııalar qyzmetinde ótken baspasóz máslıhatynda Batys Qazaqstan oblysynyń ákimi Narıman Tóreǵalıev aıtty, dep habarlaıdy QazAqparat tilshisi.

«Energetıka jáne turǵyn úı-kommýnaldyq sharýashylyq salasyna toqtalatyn bolsaq, 2023 jyly bekitilgen ınvestıtsııalardyń jalpy kólemi 11,7 mlrd teńge bolyp otyr. Osy atalǵan qarajatqa 2 myń shaqyrymnan astam ınjenerlik jelilerge kúrdeli jáne aǵymdaǵy jóndeý jumystary qarastyrylǵan. Bıyl Oral qalasynyń jylý elektr ortalyǵyn jańǵyrtý maqsatynda týrboagregat pen gradırnıany qaıta qurý boıynsha 4,8 mlrd teńgege eki joba júzege asyrylady», - dedi óńir basshysy.

Onyń aıtýynsha, týrboagregatty iske qosý nátıjesinde óndiriletin elektr energııasy 46 MVt-tan 58 MVt-qa ulǵaıatyn bolady. Al, gradırnıany iske qosqan jaǵdaıda, Jaıyq ózeninen alynatyn tehnıkalyq sýdyń kólemi 10 mln-nan 6 mln tekshemetrge azaıtylady.

«Sonymen birge, sý jylý jelilerin jańartý jáne oblys ortalyǵynda jańa qazandyq salý sııaqty jumystar iske asyrylady», - dedi Narıman Tóreǵalıev.