2 mototsıkl apatynan úsh adam kóz jumdy - Qaraǵandy oblysy
QARAǴANDY. QazAqparat - Sońǵy eki táýlikte Qaraǵandy oblysynyń joldarynda mototsıklmen jol apatyna túsken 3 adam kóz jumdy, dep habarlaıdy QazAqparat tilshisi.
«Qaraǵandy-Abaı» avtojolynda Aqtas kentinen shyǵa berer jolda «KAWASAKI Ex500d» mototsıkliniń 36 jastaǵy júrgizýshisi rýlge ıe bola almaı, qarsy baǵyttaǵy «BMW» kóligimen soqtyǵysqan.
Oqıǵa saldarynan mototsıkl júrgizýshisi mert boldy.
Sondaı-aq, 6 mamyrda Shahtınsk qalasynda «Volkswagen Golf» avtokóliginiń 19 jastaǵy júrgizýshisi «RACER» mototsıklimen betpe-bet soqtyǵysqan. Apattan mototsıkl júrgizýshisi men onyń 10 jasar jolaýshysy da kóz jumǵan.
Eki derek boıynsha tıisti saraptama taǵaıyndalyp, sotqa deıingi tergeý bastaldy.
