2 mlrd túp tal otyrǵyzý jobasy: Shet memleketterden kóshet alynbaıdy
NUR-SULTAN. QazAqparat – Qazaqstanda 2 mlrd tal otyrǵyzý jobasyna 200-den astam orman tálimbaqtary men basqa da uıymdar qatysady, dep habarlaıdy QazAqparat Orman sharýashylyǵy jáne janýarlar dúnıesi komıtetine silteme jasap.
«Qazirgi ýaqytta QR Ekologııa mınıstrligi elimizdiń aýqymdy kógaldandyrý jobasyn iske asyrýda. Onyń aıasynda 5 jylda 2 mlrd tal otyrǵyzý kózdelgen. Joba bastalǵan sátten beri 81,5 mln tal otyrǵyzyldy. Kúzde taǵy 48,2 mln tal otyrǵyzý josparlanǵan. Aǵash otyrǵyzý kólemi jyl saıyn 2021 jylǵy 129,7 mln-nan 2025 jyly 642,8 mln aǵashqa deıin ulǵaıatyn bolady», - dep habarlady komıtet.
Jobany júzege asyrý úshin mınıstrliktiń barlyq oblystary men vedomstvoǵa qarasty mekemelerinde ormandardy molyqtyrý men ósirýdiń 5 jyldyq keshendi jospary bekitildi. Olardy ázirleýde qoldanystaǵy tálimbaqtardyń jáne kóshet ósiretin basqa uıymdardyń qazirgi áleýetine taldaý jasaldy.
Osy derekterge sáıkes, aǵashtar men butalardy otyrǵyzý jumysy boıynsha josparly kórsetkishter ázirlendi. Oblystarda materıaldar jetkilikiz bolsa, josparmen jumys istep turǵan tálimbaqtardy keńeıtý jáne ýaqytsha tálimbaq qurý kózdelgen. Sondaı-aq, orman daqyldarynyń tuqymyn jınaý kórsetkishteri eskerilgen.
«Búginde Qazaqstanda orman daqyldarynyń otyrǵyzý materıaldaryn kóbeıtý men ósirýdi júzege asyratyn 44 turaqty jáne 158 ýaqytsha tálimbaqtar men uıymdar jumys isteıdi. Onda qaraǵaı, shyrsha, balqaraǵaı, qaıyń, shegirshin, sekseýil, úıeńki, shaǵan, emen jáne basqa da aǵash túrleriniń 1-3 jastaǵy kóshetteri bar. Barlyǵy – 165,5 mln dana. Aıta keteıik, jobada basqa elderden kóshet satyp alý qarastyrylmaǵan», - deıdi Orman sharýashylyǵy jáne janýarlar dúnıesi komıteti.
Eske sala ketsek, Qazaqstan orman alqaby az memleketter qataryna jatady. Orman qoryna jatatyn jerlerdiń jalpy kólemi 30 mln gektardy quraıdy. ıAǵnı respýblıkamyzdyń 11%-yn ǵana alyp jatyr. 13 mln gektar jerde orman ósýde. Ormandylyq kórsetkish 4,8% quraıdy. 2030 jylǵa qaraı eldegi orman alqaby kólemin 5%-ǵa deıin ulǵaıtý josparlanýda.
Komıtettiń habarlaýynsha, shamamen 610 myń sekseýil, 555 myńnan astam qaraǵaı, 193 myńnan astam úıeńki, 132 myńnan astam shegirshin, 100 myńnan astam qaıyń jáne basqa da aǵashtar otyrǵyzý josparlanǵan.
