2 mlrd teńgeni qolma-qol aqshaǵa zańsyz aınaldyrǵan almatylyq sottaldy
ALMATY. QazAqparat – Almaty qalasy boıynsha ekonomıkalyq tergeý departamenti, Almaty qalasynyń ekinshi deńgeıli bankterinen qarjyny zańsyz jolmen qolma-qol aqshaǵa aınaldyrý derekteriniń deńgeıin tómendetý boıynsha jumystar júrgizýde, dep habarlaıdy QazAqparat tilshisi.
Bıyl departament 63 qylmysty áshkereledi. Onyń ishinde uıymdasqan qymystyq top qurý arqyly qandaı da bir qyzmet atqarmaıtyn jaýapkershiligi shekteýli seriktestikterdiń esepshoty arqyly ekinshi deńgeıli bankterden qarajatty zańsyz qolma-qolǵa aqshaǵa aınaldyrýdyń 2 faktisin anyqtaǵan.
«Tergeý kezinde anyqtalǵandaı, Almaty qalasynyń turǵyny 2016-2019 jyldar aralyǵynda ózine tıesili kompanııa arqyly salyqtan jaltarý úshin, jalpy somasy 2 mlrd teńgege saýda-sattyq jasaldy delingen jalǵan shot-faktýralar jasaǵan», - dep habarlady QR QM Qarjy monıtorıngi komıtetiniń baspasóz qyzmeti.
Almaty qalasy Almaly aýdandyq sotynyń úkimimen qylmystyq is-áreketti uıymdastyrýshy QR QK 216-babynyń 3-bólimine sáıkes (is júzinde jumystar oryndalmaı, qyzmetter kórsetilmeı, taýarlar tıep-jóneltilmeı shot-faktýra jazý boıynsha áreket jasaý) kináli dep tanyldy. Aıyptalýshy 2 jyl 6 aı merzimge bas bostandyǵynan aıyryldy.
Sondaı-aq, sottyń úkimine sáıkes, atalǵan azamatqa ekonomıkalyq qyzmet salasynda basshylyq qyzmetpen 10 jylǵa deıin aınalysýyna shekteý qoıyldy.
