2 mlrd teńgeden asa shyǵyn: Qaraǵandyda zańsyz ken óndirgenderge úkim shyqty
ASTANA. KAZINFORM — 4 jyl boıy lıtsenzııasyz temir rýdasyn óndirip, shetelge shyǵarǵandar sottaldy, dep habarlaıdy Qaraǵandy oblysy prokýratýrasynyń baspasóz qyzmeti.
Qaraǵandy oblysynyń mamandandyrylǵan tabıǵat qorǵaý prokýratýrasy qadaǵalaý qyzmeti barysynda paıdaly qazbalardy zańsyz óndirý faktilerin anyqtady. Osy faktiler boıynsha Qaraǵandy oblysynyń arnaıy prokýrorlary sotqa deıingi tergeý júrgizdi.
Belgili bolǵandaı, oblysta kásiporyndardyń biri tórt jyl boıy temir rýdasyn lıtsenzııasyz zańsyz óndirip, ony shetelge shyǵarǵany anyqtaldy. Nátıjesinde memleketke 2 mlrd teńgeden astam shyǵyn keltirilgen. Úsh kúdikti qamaýǵa alynyp, 360 mln teńgeden astam múlikke tyıym salyndy. Atalǵan qylmystyq is boıynsha prokýratýra organdary memlekettik aıyptaýdy qoldady.
— Qaraǵandy oblysynyń Shet aýdandyq sotynyń qaraýynyń nátıjesinde úsh sottalýshy jer qoınaýyn zańsyz paıdalanǵany úshin kináli dep tanylyp, ártúrli merzimderge bas bostandyǵynan aıyrý jazasyna kesildi. Sot úkimi zańdy kúshine engen joq, — delingen habarlamada.
Aıta keteıik, jyl basynda Qaraǵandyda zańsyz temir rýdasyn óndirgen kásiporyn áshkerelengeni anyqtaldy.
Buǵan deıin ShQO-da zańsyz altyn óndirgen toptan 40 myń dollar men altyn tárkilengenin jazǵanbyz.
