2 mlrd teńge jymqyrǵan: Cot saraptamalary ortalyǵy basshylarynyń ústinen is qozǵaldy
ASTANA. KAZINFORM — QMA Astana qalasy boıynsha departamenti prokýratýranyń úılestirýimen Sot saraptamalary ortalyǵynyń laýazymdy tulǵalary men merdiger uıym basshysyna qatysty 2 mlrd teńgeden astam bıýdjet qarajatyn jymqyrý faktisi boıynsha sotqa deıingi tergeý isin tirkedi.
— 2023–2025 jyldarǵa arnalǵan nashaqorlyq pen esirtki bıznesine qarsy kúres jónindegi keshendi jospar aıasynda sot-saraptama organdaryn materıaldyq-tehnıkalyq jabdyqtaý maqsatynda respýblıkalyq bıýdjetten 10,3 mlrd teńge bólindi. Alaıda, 2023–2024 jyldary Sot saraptamalary ortalyǵynyń laýazymdy tulǵalary múddeli toppen aldyn-ala kelisip, bıýdjet ótinimin qalyptastyrý kezinde jalǵan kommertsııalyq usynystar usyný arqyly jabdyqtyń qunyn úsh ese arttyrǵan, — delingen QMA habarlamasynda.
Budan bólek, memlekettik satyp alý konkýrsy jarııalanbaı turyp, tehnıkalyq sıpattamalarda tek ózderi tanıtyn kompanııalar ǵana usyna alatyn jabdyqtar kórsetilgen.
— Múlikti tárkileý maqsatynda jalpy quny 148 mln teńgeden asatyn Almaty qalasyndaǵy 2 jer telimi, Astana qalasyndaǵy páter jáne BMW H6 men RAV 4 avtokólikterine tyıym salyndy. Sonymen qatar, bank esepshottaryndaǵy 1,6 mıllıard teńge, 367 myń AQSh dollary jáne 366 myń eýro somasyndaǵy kompanııanyń aqsha qarajaty buǵattaldy, — dep jazdy QMA baspasóz qyzmeti.
Quqyqtyq saraptama ortalyǵynyń dırektory, memlekettik satyp alý departamentiniń basshysy jáne JShS basshysy ustalyp, sot olardy 2 aıǵa qamaýda ustaý jóninde sheshim qabyldady.
QR Konstıtýtsııasynyń 77-babynyń 3-tarmaǵynyń 1-tarmaqshasyna jáne QR Qylmystyq-protsestik kodeksiniń 19-babynyń 1-bóligine sáıkes, qylmystyq quqyq buzýshylyq jasaýdaǵy kinási sottyń zańdy kúshine engen úkimimen belgilengenge deıin árkim kinásiz dep esepteledi.
Sotqa deıingi tergeý jalǵasyp jatyr.
Buǵan deıin habarlanǵandaı, Aqtaý ákiminiń eks-orynbasary Qazaqstanǵa jetkizilip, Shymkenttegi tergeý ızolıatoryna qamaldy.