2 mln teńge para: Jambyl oblystyq kóshi-qon departamentiniń basshysy úıqamaqqa alyndy
NUR-SULTAN. QazAqparat – Eńbek, áleýmettik qorǵaý jáne kóshi-qon komıtetiniń Jambyl oblysy boıynsha departamentiniń basshysy tergeýden ótip jatyr, dep habarlaıdy QazAqparat tilshisi.
«Jambyl oblysy boıynsha Sybaılas jemqorlyqqa qarsy qyzmet QR Eńbek jáne halyqty áleýmettik qorǵaý mınıstrligi Eńbek, áleýmettik qorǵaý jáne kóshi-qon komıtetiniń Jambyl oblystyq departamentiniń basshysyna qatysty sotqa deıingi tergeýdi bastady. Ol óz orynbasarynan osy laýazymǵa taǵaıyndaýǵa járdem kórsetkeni úshin 2 mln teńge somasynda para alý kúdigine ilindi», - dedi Sybaılas jemqorlyqqa qarsy is-qımyl agenttiginiń 1-shi departamentiniń aǵa tergeýshisi Danııar Bekaıdarov onlaın baspasóz máslıhatynda.
Onyń aıtýynsha, Taraz qalasynyń mamandandyrylǵan tergeý soty kúdiktige qatysty úıqamaq túrindegi bultartpaý sharasyn qoldanǵan.
