2 mln teńge para alǵan tergeýshilerdiń vıdeosy jarııalandy
ASTANA. QazAqparat - Almaty qalasynyń Alataý aýdandyq polıtsııa basqarmasynyń tergeý bólimi bastyǵynyń orynbasary para alǵany úshin kúdikke ilindi, dep xabarlaıdy QazAqparat.
Resmı málimetke sáıkes, 21 qarashada Memlekettik qyzmet isteri jáne sybaılas jemqorlyqqa qarsy is-qımyl agenttiginiń 1424-baılanys ortalyǵyna Alataý aýdandyq polıtsııasy basqarmasynyń tergeý bólimi bastyǵy orynbasary jáne osy basqarma tergeýshisiniń zańsyz áreketteri týraly shaǵym tústi.
«Olar bir kúdiktige qatysty qamaýda ustaý túrindegi bultartpaý sharasyn qoldanbaǵany úshin onyń jubaıynan 2 mln teńge somasyndaǵy para aldy dep kúdiktelýde. Kinásin tolyq moıyndaýyna baılanysty olarǵa qatysty protsestik ustaý sharasy qoldanylǵan joq», - dedi agenttiktiń resmı ókili Janna Bastarova Astanada ótken baspasóz máslıxatynda.
Onyń aıtýynsha, kez kelgen adam sybaılas jemqorlyq faktileri týraly 1424 - Call ortalyǵyna habar bere alady. Barlyq shaǵymdar boıynsha jedel áreket etý sharalary qabyldanatyn bolady.
«Azamattar sondaı-aq, bizdiń Agenttikke resmı hatpen nemese Ulttyq bıýronyń kezekshi bólimshesine, Agenttik Tóraǵasynyń resmı blogyna nemese onyń jeke elektrondyq poshtasyna shaǵym joldaı alady», - dep atap kórsetti J.Bastarova.
