2 mln-ǵa jýyq azamat JRVI juqtyrdy — DSM

ASTANA. KAZINFORM — Elimizde 2 mln-ǵa jýyq adam jedel respıratorlyq vırýstyq ınfektsııa juqtyrdy. Bul týraly búgin Májilistiń jalpy otyrysynan keıin Densaýlyq saqtaý birinshi vıtse-mınıstri Tımýr Sultanǵazıev aıtty. 

— Maýsymdyq ósim bar. Búginde shamamen 2 mln adam juqtyrdy. Bul kúz-qys maýsymyndaǵy jaǵdaı. Syrqattanýshylyq ótken jylǵy epıdemıologııalyq maýsymmen shamalas. Negizgi shtamdar — túrli JRVI, paratumaý. Onyń ishinde polımerazdy-tizbekti reaktsııa zertteýi barysynda shamamen 1 200 tumaý shtamyn da anyqtadyq, — dedi ol BAQ ókilderiniń saýalyna oraı.

Onyń aıtýynsha, elimizdiń Bas sanıtarlyq dárigeriniń adamdar qaı jerde betperde taǵýǵa keńes beriletindigine qatysty usynymy bar.

— Atalǵan qaýlydaǵy betperde taǵý talaby emhanalar men aýrýhanalarda medıtsına qyzmetkerleri úshin mindetti. Al basqa qoǵamdyq oryndarda usynym túrinde ǵana, — dedi birinshi vıtse-mınıstr.

Búgin astanalyq dáriger JRVI-ǵa baılanysty ata-analarǵa úndeý jasaǵan edi.