2 mln ga paıdalanylmaǵan jer merziminen buryn memleket menshigine qaıtaryldy
ASTANA. KAZINFORM — Qaıtarylǵan jerlerdiń 704,7 myń gektary halyqqa berildi. Bul týraly AShM baspasóz qyzmeti habarlady.
Memleket basshysy Qazaqstan halqyna Joldaýynda jer resýrstaryn tıimdi paıdalanýdyń mańyzdylyǵyn atap ótti.
— Eldiń damýy men azamattardyń ál-aýqaty úshin qyzmet etýi tıis strategııalyq resýrs — bul, sózsiz, jer. Men paıdalanylmaı jatqan jáne zańsyz berilgen aýyl sharýashylyǵy maqsatyndaǵy jerlerdi qaıtaryp, olardy qaıta bólý jóninde aýqymdy jumysty bastadym. Jer ıesiz qalmaýy kerek, ony tek onyń qadirin biletinderge berý qajet, — dedi Prezıdent.
Osy tapsyrma aıasynda 2025 jyly Aýyl sharýashylyǵy mınıstrligi maqsatyna saı paıdalanylmaǵan nemese zań buzýshylyqtarmen berilgen jerlerdi qaıtarý jónindegi jospardy merziminen buryn oryndady.
Jumys respýblıkalyq, oblystyq jáne aýdandyq deńgeılerde júıeli túrde júrgizildi. Baqylaý maqsatynda Jerdi qaıta bólý jónindegi respýblıkalyq komıssııa jáne oblystyq vedomstvoaralyq jumys toptary quryldy.
Jyl ishinde respýblıkalyq komıssııanyń 3 jáne oblystyq jumys toptarynyń 42 otyrysy ótip, tekserý nátıjeleri men aldaǵy sharalar talqylandy.
Tekserý 2,2 mln gektar jerdi qamtydy: 1,8 mln gektar boıynsha 1 286 uıǵarym berildi, 281,4 myń gektar jerge qatysty sot protsesteri jalǵasyp jatyr, al buryn paıdalanylmaǵan 464,7 myń gektar jerdi jer paıdalanýshylar óz betimen ıgere bastady.
Qaıtarylǵan jerlerdiń 704,7 myń gektary halyqqa berildi: onyń ishinde 176,6 myń gektary — qoǵamdyq jaıylymdar, 528,1 myń gektary — aýyl sharýashylyǵy taýar óndirýshilerine konkýrs arqyly bólindi.
«Jer amanaty» komıssııasy men «AMANAT» partııasy protsesstiń ashyqtyǵyn jáne qoǵamnyń qatysýyn qamtamasyz etti.
Jospardyń merziminen buryn oryndalýy jer resýrstarymen jumys isteýdiń tıimdiligin, jerdi utymdy paıdalaný úshin jaǵdaı jasalǵanyn jáne Qazaqstan aýyl sharýashylyǵynyń odan ári damýyna serpin berilgenin kórsetedi.
Aıta ketelik Almatyda memleket muqtajyna taǵy 32 jer telimi alynatyny týraly jazǵan edik.