2 myńnan astam jańa mamandyq aıqyndaldy – Saıasat Nurbek
ASTANA. KAZINFORM — Úkimet otyrysynda Ǵylym jáne joǵary bilim mınıstri Saıasat Nurbek bilim berý baǵdarlamalaryna qandaı jańartýlar engizilip jatqanyn málimdedi.
Sala basshysynyń sózinshe, kadrlar daıarlaýdyń ozyq júıesin qalyptastyrý maqsatynda 20 óńirlik karta ázirlendi. Olarda 2 myńnan astam jańa mamandyq aıqyndalyp, qoldanystaǵy mamandyqtardyń transformatsııasy kórsetilgen.
– Eńbek fýnktsııasynyń ózi ózgerip jatyr. Energetık IT-energetıkke, agronom tsıfrlyq agronomǵa aınalyp jatyr. Tsıfrlyq egizder jáne óndiristik protsesterde jasandy ıntellektini qoldaný boıynsha mamandar paıda bolyp jatyr. Mindet – bul ózgeristerdi araǵa ýaqyt salmaı bilim berý baǵdarlamalaryna engizý. 2026 jyly Jańa mamandyqtar atlasy negizinde 1 983 bilim berý baǵdarlamasy jańartyldy, al 2022 jyly nebári 7 baǵdarlama ǵana bolǵan edi, – dedi mınıstr.
Aıqyn mysal retinde ol ushqyshsyz ushý apparattary men júıelerin atap ótti.
– Búgingi tańda ushqyshsyz ushý apparattary aýyl sharýashylyǵynda, geologııada, energetıkada, qurylysta, logıstıkada jáne basqa da salalarda qoldanylyp keledi. Mamandardy daıarlaý azamattyq avıatsııa, aeroǵaryshtyq ınjenerııa, jerdi qashyqtyqtan zondtaý jáne ushqyshsyz apparattardy basqarý baǵyttary boıynsha 8 joǵary oqý ornynda júrgizilýde. Olarda 430 stýdent oqyp jatyr, – dedi Saıasat Nurbek.
Aıta keteıik, buǵan deıin Úkimet otyrysynda Eńbek mınıstri qandaı mamandyqtar joıylatynyn málimdegen edi.
