2 myńnan astam mektep ashanasynda sanıtarııalyq talap buzylǵan – DSM
ASTANA. KAZINFORM – Elimizde mektepterdiń jańa oqý jylyna daıyndyǵyn baqylaý barysynda 2 087 ashanada sanıtarııalyq-epıdemıologııalyq talaptardyń buzylǵany anyqtaldy. Bul týraly QR Densaýlyq saqtaý mınıstrligi Sanıtarııalyq-epıdemıologııalyq baqylaý komıtetiniń tóraǵasy Sarhat Beısenova málim etti.
Ortalyq kommýnıkatsııalar qyzmetinde ótken baspasóz máslıhatynda ol bıyl maýsym aıynda bilim berý uıymdarynyń jańa oqý jylyna daıyndyǵyna monıtorıng júrgizilgenin aıtty.
Monıtorıng barysynda elimizdegi mektepterdiń 99%-y, ıaǵnı 7 121 mektep qamtylǵan. Sondaı-aq 6 338 mektep ashanasynyń, 6 256 medıtsınalyq pýnkttiń jáne 262 mektep-ınternattyń jaǵdaıy zerdelengen.
– Onyń ishinde 1 168 mektep pen 45 mektep-ınternattyń ashanasynda sanıtarııalyq-tehnıkalyq jaǵdaı talapqa saı emes. Sondaı-aq tehnologııalyq jáne tońazytqysh jabdyqtar jetkiliksiz, – dedi Sarhat Beısenova.
Mundaı kemshilik eń kóp Túrkistan oblysynda anyqtalǵan – 259. Qaraǵandy oblysynda 163, Almaty qalasynda 123, Qyzylorda oblysynda 115 jaǵdaı tirkelgen.
Komıtet tóraǵasynyń aıtýynsha, anyqtalǵan kemshilikterdiń bir bóligin bilim berý uıymdary jańa oqý jylyna daıyndyq barysynda óz kúshimen joıa alady. Oǵan qomaqty qarjy qajet emes.
– Degenmen qarjy bólýdi qajet etetin máseleler de bar. Olardyń qatarynda ınjenerlik jelilerdi, shatyrlardy, jeldetý, jylytý jáne sýmen jabdyqtaý júıelerin jóndeý bar. Budan bólek, ashanalar men medıtsınalyq pýnktterdi jóndep, qajetti qural-jabdyqtarmen qamtamasyz etý qajet, – dedi ol.
Sarhat Beısenova anyqtalǵan kemshilikter mindetti túrde joıylyp, turaqty baqylaýda bolýy tıis ekenin atap ótti.
Buǵan deıin Qyzylorda oblysynda monıtorıng júrgizilgen 279 mektep ashanasynyń 165-inde sanıtarııalyq talaptardyń buzylǵany anyqtalǵanyn jazǵan edik.
