2 myńnan 125 myń teńgege deıin: Qazaqstanda jeldetkishter qansha turady
ÓSKEMEN. KAZINFORM – Jazda aptap ystyqtyń kúsheıýine baılanysty jeldetkishterge suranys artyp, olardyń baǵasy da kópti qyzyqtyryp otyr. Qazaqstan óńirlerindegi baǵaǵa taldaý jasap, qaı qalada bul turmystyq tehnıkany eń arzan, al qaı aımaqta áldeqaıda qymbat satyp alýǵa bolatynyn bilip kórdik.
Elimizde ústelge qoıylatyn jeldetkishterdiń baǵasy 2 myńnan 54 990 teńgege deıin, al edenge qoıylatyn úlgilerdiń quny 5 myńnan 125 myń teńgege deıin jetedi.
Eń arzan ústel jeldetkishteri Qostanaı men Shymkentte satylady. Munda olardyń baǵasy 2 myń teńgeden bastalady. Qyzylordada osyndaı qurylǵyny 2,5 myń teńgeden, Tarazda 3 myń teńgeden, al Aqtóbe, Pavlodar, Qaraǵandy jáne Taldyqorǵanda 4 myń teńgeden satyp alýǵa bolady.
Al eń qymbat ústel jeldetkishteri Óskemende tirkelgen – munda olardyń baǵasy 54 990 teńgege deıin barady. Odan keıin Semeıde – 50 myń teńgege deıin, Aqtaý men Oralda – 45 990 teńgege deıin, Atyraýda – 41 990 teńgege deıin, Petropavl men Jezqazǵanda – 40 myń teńgege deıin jetedi. Astanada eń qymbat baǵa 35 990 teńgeni qurasa, Pavlodar, Qaraǵandy jáne Túrkistanda – 30 myń teńge. Al Shymkent, Qyzylorda, Taraz, Taldyqorǵan, Almaty, Kókshetaý jáne Qostanaı qalalarynda baǵa dıapazony eń tómen deńgeıde.
Edenge qoıylatyn jeldetkishterdiń eń tómen baǵasy Tarazda tirkelgen, naqty aıtqanda 5 myń teńgeden bastalady. Odan keıin Pavlodarda – 6,3 myń teńgeden, Aqtóbede – 6,5 myń teńgeden, Qyzylordada – 7 myń teńgeden, Túrkistanda – 7,5 myń teńgeden, Taldyqorǵanda – 8,6 myń teńgeden satylady. Al Astana, Almaty, Aqtaý, Oral, Óskemen jáne Semeı qalalarynda osyndaı jeldetkishterdiń bastapqy baǵasy 8 990 teńgeni quraıdy.
Eń qymbat eden jeldetkishteri Astanada satylyp jatyr. Munda jekelegen úlgilerdiń baǵasy 125 myń teńgege deıin jetedi. Almatyda eń joǵary baǵa – 120 990 teńge. Odan keıin Semeıde – 90 myń teńgege deıin, Óskemende – 89 myń teńgege deıin, Atyraýda – 82 990 teńgege deıin, Qonaevta – 74 myń teńgege deıin jetedi. Qalǵan óńirlerde eń joǵary baǵa 20 myńnan 66 myń teńge aralyǵynda qubylady.
Osylaısha, Qazaqstan óńirlerinde jeldetkishterdiń baǵasy aıtarlyqtaı erekshelenedi. Eger ústelge qoıylatyn eń qarapaıym úlgilerdi 2 myń teńgege satyp alýǵa bolsa, premıým sanatyndaǵy modelderdiń baǵasy 55 myń teńgege jýyqtaıdy. Al edenge qoıylatyn jeldetkishterdiń quny 5 myńnan 125 myń teńgege deıingi aralyqta.
Eske salsaq, osyǵan deıin Qazaqstanda kvasty, gazdalǵan sýsyn men sýdy qaı qalada arzanǵa satyp alýǵa bolatyndyǵy jaıly jazǵanbyz.
