2 myńǵa jýyq búldirshin ýlandy: Ózbekstan balabaqshalarynda azyq-túlik sapasy tekserilip jatyr

TAShKENT. KAZINFORM – Tashkent oblysynda balalardyń jappaı ýlaný oqıǵasyn tergeý úshin Ózbekstannyń Bas prokýratýrasy arnaıy jumys tobyn qurdy, dep habarlaıdy Kazinform agenttiginiń menshikti tilshisi.

Toqtala keteıik, 24 qyrkúıekte Tashkent oblysyndaǵy memlekettik balabaqshalarda balalar astan ýlanyp, 960-tan astam búldirshin aýrýhanaǵa jatqyzyldy. Sonymen qatar, túrli shaǵymdarmen dáriger kómeginge júgingenderdiń sany 1 900-den asty.

Atalǵan oqıǵa boıynsha «Sanıtarlyq zańnamany nemese epıdemııamen kúres erejelerin buzý» baby boıynsha qylmystyq is qozǵalyp, 7 kúdikti qamaýǵa alyndy.

- Tergeýdi sapaly júrgizý maqsatynda qylmystyq isti Bas prokýratýra baqylaýǵa aldy, tıisinshe Bas prokýrordyń birinshi orynbasary Bahrıddın Valıev jetekshilik etetin arnaıy jumys toby quryldy, - dep málim etti vedomstvodan.

Mundaı jaǵdaılardyń aldyn alý úshin memlekettik balabaqshalardy azyq-túlikpen qamtamasyz etetin kompanııalarǵa tekseris bastaldy. ıAǵnı, Bas prokýratýra olarda sanıtarlyq jáne gıgıenalyq normalardyń qanshalyqty saqtalatynyn anyqtaýmen aınalysyp jatyr.

Aıta keteıik, sút ónimderinen ýlanǵan 2 myńǵa jýyq búldirshinniń 182-si aýrahanalarda áli em alyp jatyr. Ózbekstan Sanıtarlyq-epıdemıologııalyq salaýattylyq jáne qoǵamdyq densaýlyq komıteti bastyǵynyń orynbasary Nýrmat Atabekovtiń aıtýynsha, naýqastardyń densaýlyǵy jaqsaryp keledi. Birde-bir balada dert aýyr hálde ótken joq.