2 mıllıonnan astam bala elimizdiń saýyqtyrý lagerlerinde demalady - QR BǴM
ASTANA. QazAqparat - Jazǵy demalys kezinde balalardy saýyqtyrý demalysymen, eńbekpen barynsha qamtý qajet. Búgin jazǵy demalysty uıymdastyrý jáne demalys kezeńinde jastar týrızmin damytý máselelerine arnalǵan selektorlyq keńeste QR Premer-Mınıstriniń orynbasary Darıǵa Nazarbaeva osyndaı tapsyrma berdi, dep habarlady Úkimet basshysynyń resmı saıty.
QR Bilim jáne ǵylym mınıstrliginiń aqparatyna qaraǵanda, jaz aılarynda 11 893 saýyqtyrý lagerleri men alańdarda 2 mln. 116 myń balany demaldyrý josparlanǵan. Bul 1-10 synyp oqýshylarynyń jalpy sanynyń 83 paıyzyna teń. Jalpy, elimizde bastaýysh jáne orta mektepte 2 mln. 562 myń bala bilim alady. Aǵymdaǵy jyly halyqtyń áleýmettik jaǵynan az qamtylǵan tobynan 507930 bala memlekettik bıýdjet esebinen saýyqtyrý demalysymen jáne eńbekpen qamtylady.
Keńes barysynda balanyń densaýlyǵy men qaýipsizdigin qorǵaýǵa basa mán berildi. Úkimet basshysynyń orynbasary demalys ornyna balalardy qaýipsiz jetkizýdi qamtamasyz etý úshin jolaýshylar kóligin baqylap birge alyp barý, lagerlerdiń barlyǵyna medıtsınalyq uıymdardy bekitýden bólek maýsymnyń qaýyrt kezeńinde sý qoımalaryndaǵy qaýipsizdik máselelerine de basa nazar aýdartty.
«Muny ákimdikter tyńǵylyqty qarastyrýy tıis. Olar arnaıy oryndar jasaqtaý, ol oryndardy abattandyrý kerek. Ol jerlerde qutqarý qyzmeti mindetti túrde bolýy qajet», - dep atap ótken D.Nazarbaeva balalardyń qaýipsizdigin qamtamasyz etýde túbegeıli sharalar qabyldaý qajettigin tapsyrdy.
Balalardy saýyqtyrý lagerlerimen jáne jumyspen keńinen qamtýǵa memlekettik-jeke seriktestik bazasynda balalar demalys lagerlerin damytý óz septigin tıgizedi. Al oqý jyly boıynda mundaı lagerler ońaltý ortalyqtary retinde de paıdaǵa jaraıtyn bolady. QR Premer-Mınıstriniń orynbasary mundaı lagerlerdi qamtý baǵdarlamasyn ázirleýdi elimizdiń Bilim jáne ǵylym mınıstrligine ákimdiktermen birge qolǵa alýdy tapsyrdy.
«Bul lagerler óte úlken rólge ıe bola alady. Olar jyl boıy jumys isteıtin bolady. Kommertsııalyq múdde turǵysynan alyp qaraǵanda, olar barynsha tartymdy. Bul rette QR Densaýlyq saqtaý jáne áleýmettik damý mınıstrligi men jergilikti jerlerdegi densaýlyq saqtaý basqarmalarynyń kelisimi bolǵany mańyzdy», - dep qosty D.Nazarbaeva.
QR Premer-Mınıstri orynbasarynyń aıtýynsha, «qazirgi ýaqytta biz ishki týrızmdi damytýǵa múddelimiz, al bilim salasy týrızm ındýstrııasyna týrısterdiń mol legin tarta alady».
«Bul oraıda oqýshylar men stýdentter úshin týrıstik baǵdarlar óz óńiriniń sheginde ǵana emes, sonymen birge óńirler arasynda da bolýy tıis. Mine, osy jumysty kúsheıtý qajet. Bul úshin sáıkesinshe ınfraqurylymdar qurý kerek», - dedi Úkimet basshysynyń orynbasary D.Nazarbaeva.
Osy rette ol tıisinshe memlekettik organdarǵa balalar men jasóspirimderdiń týrıstik baǵdarynyń respýblıkalyq tizilimin qurýǵa belsene qatysýdy tapsyrdy.
