2 mıllıon gektardan astam aýmaqta «Yrǵyz-Torǵaı-Jylanshyq» ekologııalyq dálizi quryldy

«Ekologııalyq dáliz Yrǵyz-Torǵaı jáne «Altyn dala» memlekettik tabıǵı rezervattar aýmaqtaryn qamtıdy (Qostanaı oblysy). Bul aýmaqtar kıikterdiń betpaqdalalyq ósip-ónýin, tabıǵı óristeý joldaryn qorǵaý men tóldeýin qamtamasyz etý maqsatymen baılanystyrylyp otyr», - delingen QR QOSRM baspasóz qyzmetiniń málimetinde.

Ekologııalyq dálizdi qurý barysynda dalalyq ekojúıelerdiń, topyraqtyń, klımattyń jaǵdaıy eskerilip, kıikterdi ǵarysh seriginen baqylaý málimetteri qoldanyldy. Ǵylymı málimetter men kartografııalyq materıaldardyń saraptamalary ekologııalyq dálizdiń aýmaǵyn anyqtap, belgileýge múmkindik berdi.

Bul jumys Jahandyq ekologııalyq qordyń, BUU Damý baǵdarlamasynyń jáne QR QOSRM Orman jáne ańshylyq sharýashylyǵy komıtetiniń dalalyq ekojúıelerdi saqtaý jáne ornyqty basqarý jónindegi birlesken jobany iske asyrý aıasynda jasaldy.

Nátıjesinde qorǵaýǵa alynǵan dala ekojúıeleriniń aýmaǵy 2,4 mıllıon gektardan 4,8 mıllıon gektarǵa deıin ulǵaıdy.

Bıyl júrgizilgen esep boıynsha, kıikterdiń betpaqdalalyq ósip- ónýi 216 myń basqa jetti.