2 mlrd aǵash egý tapsyrmasy nege oryndalmady – ekologııa mınıstriniń jaýaby
ASTANA. KAZINFORM – Memleket basshysynyń 2025 jylǵa deıin 2 mlrd aǵash egý jónindegi tapsyrmasyn oryndaý 2027 jylǵa, ıaǵnı eki jylǵa keıinge shegerildi. Ekologııa jáne tabıǵı resýrstar mınıstri Erlan Nysanbaev Jibek Joly arnasyna bergen suhbatynda Prezıdent tapsyrmasy ne sebepti ýaqtyly oryndalmaǵanyn túsindirip berdi.
Mınıstrdiń aıtýynsha, aǵash otyrǵyzý – keshendi is. Onyń ishine jumys josparyn ázirleý, tuqym jınaý men ony saqtaý, topyraqty daıyndaý, otyrǵyzý jumysy, kútip-baptaýǵa arnalaǵan sharalar kiredi. Ótken jyly memlekettik orman qoryna 1 mıllıard 150 mıllıon kóshet materıaly egildi. Tapsyrmanyń tolyq kólemde oryndamaýyna jergilikti ákimdikterdiń jetkilikti deńgeıde aqsha bólmeýi áser etken eken.
- Memleket basshysynyń tapsyrmasyn tolyq kólemde oryndamaýyna keler bolsaq, basty sebep – jergilikti atqarýshy organdar tarapynan qarjylandyrýdyń bolmaýy. Basa aıtqym keletini, memlekettik orman qorynyń 80 paıyzy ákimdikterdiń qaraýynda. Olar tuqym jınaýdan bastap barlyq satyǵa jaýapty. Oǵan qosa maýsymdyq jumysshylardyń sanyn arttyrý, arnaıy tehnıkalar satyp alý máselesi týyndady, - dedi Erlan Nysanbaev.
Mınıstrdiń sózinshe, Prezıdent tapsyramasyna deıin jylyna 50-55 myń gektar alqapqa aǵash otyrǵyzylyp kelgen, qazir kólem eki eseden astam ulǵaıdy. Sáıkesinshe, traktor, aǵash otyrǵyzý tehnıkalary men jumysshy sanyn arttyrý kerek. Tuqym kólemi de 500 tonnadan 1250 tonnaǵa deıin ósken.
- Tuqymsyz kóshet alý múmkin emes, al tehnıkasyz mundaı kólemdegi tuqymdy egý týraly sózdiń ózi artyq. Atalǵan baǵyttaǵy jumystar avtomattandyrylmaǵan, bárine jumys kúshi, tehnıka kerek ekeni túsinikti. Álem elderi de osy jolmen kele jatyr, - dep atap óttiErlan Nysanbaev.
Erlan Nysanbaevtyń aıtýynsha, 2021-2023 jyldary josparlanǵan jumystyń 70-75 paıyzy oryndaldy. Qalǵan bóligi 2026-2027 jyldarǵa shegerildi. 2023 jyldan bastap mınıstrlik tuqym jınaý máselesin qatań baqylaýǵa aldy. 10 tamyzǵa deıin aldaǵy eki jylǵa arnalǵan kóshet ósirý boıynsha baıandama jasalady.
Suhbattyń tolyq nusqasyn búgin saǵat 19.30-da Jibek Joly telearnasynan kóre alasyzdar.
Jalpy eki mıllıard aǵash egý bastamasy alǵashqy jyldary-aq jospardaǵy mejege jete almaı, artta qala bastady. Qarqyndy qalpyna keltirip, qýyp jetý nege múmkin bolmaı qalǵanyn buǵan deıin Kazinform analıtıkalyq sholýshysy anyqtap kórgen edi.