2 kúnde DAISh sodyrlarynyń shabýylynan qaza tapqan lıvııalyqtardyń sany 169 adamǵa jetti
ASTANA. QazAqparat - Lıvııanyń Sırt qalasynda DAISh («Islam memleketi») lańkestik tobynyń shabýyly saldarynan eki kúnniń ishinde qaza tapqandardyń sany 169 adamǵa jetti, dep habarlady sheteldik BAQ.
Jergilikti derekkózderdiń aqparatyna qaraǵanda, IM sodyrlary men olardyń qarsylastarynyń arasyndaǵy qaqtyǵystar saldarynan Sırt qalasynyń turǵyndary baspanalaryn tastap, bas saýǵalaýǵa májbúr bolýda. Buǵan qosa, DAISh sodyrlary qalaǵa birneshe márte shabýyl jasaǵan. Máselen, beısenbi kúni olar 30 jergilikti turǵyndy óltirse, juma kúni sodyrlar qala aýdandarynyń birindegi medıtsınalyq ortalyqtyń 22 emdelýshisin óltirgendikterin jarııa etken.
Sonymen qatar Bengazı qalasynda DAISh sodyrlary men Lıvııa armııasy arasyndaǵy qarýly qaqtyǵys kezinde keminde 42 adam oqqa ushyp, ondaǵan adam jaraqat alǵan.
