2 kún ishinde kóligin mas kúıinde basqarǵan 348 júrgizýshi ustaldy

ASTANA. 23 qazan. QazAqparat - Jol-kólik oqıǵasyn qysqartý jáne olardyń saldaryn tómendetý maqsatynda QR Іshki ister mınıstrligi qazannyń 21-27 aralyǵynda «Qaýipsiz jol» jalpyrespýblıkalyq aldyn alý sharasyn ótkizýde. Bul aqparatty QR ІІM Ákimshilik polıtsııa komıtetinen habarlady.

Shara ótkizilgen alǵashqy 2 kúnniń ishinde 15223 jol erejesin buzý faktisi tirkeldi. Onyń ishinde 348 azamat kóligin mas kúıinde basqarsa, 164 júrgizýshi kóligin qujatsyz basqarǵan. Sonymen qatar jyldamdyq rejimin arttyrýdyń 3029 faktisi tirkelse, 484 júrgizýshi jol erejesin óreskel buzyp, qozǵalystyń qarsy betine shyǵyp ketken. Budan bólek 1312 júrgizýshi apatty jaǵdaı týyndatsa, 387 azamat jaıaý júrginshige jol bermegen. Qaýipsizdik belbeýin taqpaýdyń 2201, kólik quralyn basqarý barysynda uıaly telefonmen sóılesýdiń 1084 faktisi tirkelse, 554 júrgizýshi memlekettik tehnıkalyq tekserýsiz kóligin basqarǵan.

Sondaı-aq atalǵan shara qolǵa alynǵan kúnnen beri 1152 júrginshi jol qozǵalysy erejesin buzǵany úshin ákimshilik jaýapkershilikke tartyldy.

Aıta keteıik, taıaýda ótken Úkimettiń keńeıtilgen otyrysynda Elbasy Nursultan Nazarbaev Qazaqstannyń júrek-qan tamyrlary aýrýlarynan bolǵan ólim jóninen birinshi, jol-kólik oqıǵalarynan bolǵan ólim jóninen ekinshi oryn alatyny atap ótken bolatyn. Memleket basshysynyń alǵa tartqan derekterine qaraǵanda, ótken jyly jol boıynda 2145 adam, bıyldyń ózinde 2273 adam qaza boldy. Osyǵan oraı QR Prezıdenti kólikti alkogoldi ishimdik iship alyp júrgizgender úshin jaýapkershilikti kúsheıtýdi tapsyrǵan edi.