2 kezeńmen ótedi — Aýyl sharýashylyǵy sanaǵy qaı aılarda júrgiziledi

ASTANA. KAZINFORM – Ulttyq aýyl sharýashylyǵy sanaǵy eki kezeńmen júrgiziledi. Bul týraly Ulttyq statıstıka bıýrosynyń basshysy Maqsat Turlybaev aıtty. 

— Negizgi sanaq kezeńderi bastalǵanǵa deıin 2025 jylǵy 1-30 maýsym aralyǵynda elimizdiń 70 qalasynda jeke qosalqy sharýashylyqtaryn aldyn ala aralaý júrgiziletin bolady. Lıstıng dep atalatyn bul kezeńde sanaq qyzmetkerleri saýalnamadan ótýge jatatyn úı sharýashylyqtarynyń tizimderin naqtylaıdy. Bul jumys tańdalǵan mekenjaı boıynsha turǵyndardyń shynymen turatynyn jáne jeke qosalqy sharýashylyq júrgizetinin rastaý úshin júrgiziledi, — dedi ol OKQ alańynda.

Sondaı-aq spıker sanaqtyń qashan aıaqtalatynyn atap ótti.

— Sanaqtyń negizgi kezeńi 1 tamyz ben 20 qazan aralyǵyn qamtıdy. Іshinde ol onlaın jáne oflaın kezeńderge bólinedi. Aldymen 1-31 tamyz aralyǵynda sanaq.gov.kz. saıtynda onlaın-saýalnama júrgiziledi. Búginde saıt sanaq jumysymen tanysý úshin jumys istep tur. Zańdy tulǵalar, fermerler, úı sharýashylyqtary — barlyǵy portaldaǵy sanaq paraqtaryn qashyqtan óz betinshe toltyra alady. Bul ádis óte yńǵaıly, sonymen qatar derekterdi jınaýdyń tıimdiligi men sapasyn arttyrýǵa múmkindik beredi, — dedi Maqsat Turlybaev.

Eske salsaq, bıyl elimizde araǵa 18 jyl salyp aýyl sharýashylyǵy sanaǵy ótedi.

Buǵan deıin sanaq kezinde derek berýden bas tartqandarǵa qandaı jaza baryn jazǵan edik.