2 qazan. QazAqparat kúntizbesi
2 qazan, SEISENBІ
Zorlyqqa qarsy halyqaralyq kún
BUU Bas Assambleıasy tarapynan 2007 jylǵy 27 maýsymda (BUU A/RES/61/271 qarary) belgilendi. 2007 jyldan bastap jyl saıyn 2 qazanda kúsh qoldanbaý fılosofııasynyń negizin qalaýshy Mahatma Gandıdiń týǵan kúninde atap ótiledi.
Osy halyqaralyq kúnniń maqsaty, Bas Assambleıanyń qararynda aıtylǵanyndaı, beıbitshilik, tózimdilik, túsinistik jáne kúsh qoldanbaý mádenıetin bekitýge qol jetkizý. Qarar barsha adamdy osy kúndi toılaýǵa shaqyrady.
Halyqaralyq áleýmettik pedagog kúni
2009 jyldyń mamyr aıynda Kopengagende áleýmettik pedagogtardyń XVII Halyqaralyq konferentsııasy bolyp ótti. Bul sharaǵa 44 eldiń ókilderi qatysty. Konferentsııa barysynda barlyq áleýmettik pedagogtardyń halyqaralyq merekesin bekitý sheshimi qabyldandy.
Gvıneıa Respýblıkasynyń Memlekettik meıramy - Táýelsizdik kúni (1958)
Gvıneıa - Batys Afrıkada ornalasqan memleket. Soltústiginde Gvıneıa-Bısaý, Senegal jáne Malımen, shyǵysynda jáne ońtústik-shyǵysynda Kot-d'Ivýarmen, ońtústiginde Lıberııa, Serra-Leonmen, batysynda Atlant muhıtymen shektesedi. Astanasy - Konakrı qalasy. Resmı tili - frantsýz tili. Aqsha birligi - sılı. Eldi prezıdent basqarady. Zań shyǵarýshy organy bir palataly parlament.
Qazaqstan Respýblıkasy men Gvıneıa Respýblıkasy arasyndaǵy dıplomatııalyq qarym-qatynas 1992 jylǵy 6 maýsymda ornatyldy.
Italııada Atalar men ájeler kúni
Italııa Eýropada Atalar men ájeler kúni ulttyq deńgeıde toılanatyn alǵashqy el boldy. 2005 jyldan bastap Italııada La Festa dei Nonni dep atalatyn osy meıram ár jyly toılanady.
ESTE QALAR OQIǴALAR
1980 jyly Tselınograd qalasynda (qazirgi Astana) tyń jáne tyńaıǵan jerlerdi ıgerýdiń 25 jyldyǵyna oraı Qazirgi zamanǵy óner mýzeıi ashyldy. Alǵashqy 500 shyǵarmalar toptamasyn Almaty qalasynda ótken «Jer jáne adam» atty Búkilodaqtyq kórme syıǵa tartty. Búgingi tańda, mýzeıde Qazaqstan, Reseı jáne TMD elderi sheberleriniń 3 000-nan astam óner týyndylary bar.
1982 jyly Nurǵısa Tilendıev atyndaǵy Akademııalyq folklorlyq-etnografııalyq orkestr quryldy. Orkestr ǵasyrlar boıy baǵa jetpes mádenı mura bop kele jatqan qazaq ulttyq mýzykalyq aspaptarynyń baı qorymen tanysý múmkindigin beredi.
«Otyrar sazy» orkestrinde dombyra men qobyzdan tys jetigen, sherter, shańqobyz, mesqobyz, syrnaı, sazsyrnaı, sybyzǵy, sondaı-aq asataıaq, daýylpaz, tuıaqtas, qońyraý, qaıraq sııaqty soqpaly aspaptardyń daýysynan sýsyndaýǵa bolady.
1991 jyly ǵaryshqa ushpaı turyp-aq, Keńes Odaǵynyń Batyry atanǵan jerlesimiz, tuńǵysh qazaq ǵaryshkeri Toqtar Áýbákirov KSRO ǵaryshker-ushqyshy Aleksandr Volkov, Avstrııa Respýblıkasynyń azamaty Frants Fıbek úsheýi «Soıýz TM-13» ǵarysh kemesimen ǵaryshqa attandy. Sonymen qatar osy kúni Elbasy Nursultan Nazarbaev Baıqońyr ǵarysh aılaǵynan respýblıkanyń Ulttyq aeroǵaryshtyq agenttigin qurý týraly jarııa etti.
1992 jyly Óskemen qalasynda Shyǵys Qazaqstan halyqtarynyń Dostyq úıi ashyldy. Dostyq úıin Qazaqstan Respýblıkasynyń Prezıdenti, Qazaqstan halqy Assambleıasynyń tóraǵasy N.Á.Nazarbaev ashty. Ol respýblıkada osyndaı alǵashqy úı boldy.
1992 jyly TMD-da jańa úlgidegi alǵashqy joǵary oqý orny - Qazaqstandyq menedjment, ekonomıka jáne boljaý ınstıtýty ashyldy.
1993 jyly Almatyda «Qazaqstan halyqtarynyń birligi» odaǵynyń І sezi ótti.
2009 jyly Qazaqstan ashyq daýys berý jolymen 2 jyl merzimge Standarttaý jónindegi halyqaralyq keńeske saılandy.
Qazaqstannyń kandıdatýrasy ISO Keńesine AQSh, Japonııa, Izraıl, Avstrııa, Polsha, Ońtústik Afrıka Respýblıkasy jáne taǵy basqa elderdiń attarynan usynyldy. «ISO Keńesiniń jumysyna atsalysý bizdiń elimizge jáne ortalyqazııalyq óńirdiń barlyq eline halyqaralyq standarttaý salasyndaǵy strategııalardy taldaýǵa jáne qalyptastyrýǵa, jahandyq máselelerdi sheshýge qatysty óz ıdeıalaryn usynýǵa múmkindik beredi».
Uıym 700-den astam halyqaralyq uıymmen yntymaqtastyqta jáne álemniń 162 eliniń basyn qosyp otyr. Al ISO Keńesine 18 el kiredi.
2012 jyly Petropavlda qazaqtyń dańqty aqyny Maǵjan Jumabaevtyń tragedııalyq taǵdyry jaıly derekti fılmniń túsirilimi bastaldy.
Shyǵarmanyń sıýjettik jelisi Maǵjannyń týǵan jerin sheksiz súıetin kúresker aqyn retinde qalyptastyrǵan ómir jolyna qurylǵan.
Túsirilim jumystary Petropavldaǵy Muhtar Áýezovtiń mýzeı úıiniń aýmaǵynda júrgizildi. Túsirilim tobynyń músheleri Maǵjannyń týǵan jeri Sarytomar aýylynda boldy.
2013 jyly Astanada aıyna 2 ret eki tilde (qazaqsha jáne oryssha) shyǵyp otyratyn «Elordalyq bilim berý» pedagogıkalyq gazetiniń tanystyrylymy ótti.
2013 jyly Almatyda Qazaqstan kınoakademııasynyń resmı túrde ashylýy ótti.
2013 jyly Astanada «D'arts» sańyraý akterlardyń tuńǵysh kásibı teatry ashyldy. Búgingi tańda trýppa múkis jáne nashar estıtin segiz akterdan quralǵan.
2014 jyly Atyraýda Qoǵamdyq kelisim jáne dostyq úıi ashyldy. Onda oblysta qyzmet etetin 17 etnomádenı birlestiktiń barlyǵy ornalasqan. Onyń salynýyna jergilikti bılik 170 mln teńge qarjy bóldi.
2015 jyly Atyraý munaı óńdeý zaýytynda resmı saltanat barysynda jańa ónim - paraksıloldyń birinshi partııasy alyndy.
2016 jyly Meksıka Qurama Shtattarynyń Depýtattar kongresinde (Meksıka Parlamentiniń tómengi palatasy) Qazaqstannyń Meksıkadaǵy Elshiliginiń bastamasymen «Meksıka-Qazaqstan» parlamenttik dostyq tobynyń resmı qurylý saltanaty boldy.
2017 jyly «Rýhanı jańǵyrý» baǵdarlamasy aıasynda Aqmola oblysynyń Eńbekshilder aýdanynda tuńǵysh ret «Týǵan jer» jobasy boıynsha týrıstik ekspedıtsııa uıymdastyryldy. Ekspedıtsııanyń alǵashqy baǵyty tanymal ánshi, aqyn, kompozıtor, Aqmola óńiriniń maqtanyshy Birjan sal Qojaǵululynyń ómirin zertteýge arnaldy. Balalar Birjan sal atyndaǵy mýzyka mektebine, Birjan sal atyndaǵy aýdandyq Mádenıet úıine jáne Birjan saldyń basyna baryp, uly aqynnyń ómirinen kóptegen qyzyqty aqparat aldy.