2 aıda 20 myń oqyrman jınadym — Zeınet jasynda blog bastaǵan ana

ASTANA. KAZINFORM — Qartaıǵan shaqta da armandaýǵa, saıahattaýǵa, jańa dúnıeni úırenýge jáne qýanyshqa bólenýge bolady. Qazir áleýmettik jelide de jastarǵa kórgen-bilgenin úıretip, ónege kórsetip júrgen jandar az emes.

Solardyń biri — 55 jasynda blogerlikke qadam basqan Zámzágúl Nurtaeva.

— Shynymdy aıtsam, bloger bolý oıymda joq edi. Biraq qyzym únemi «Anashym, sizdiń qolyńyzdan bári keledi. Nege paraqshańyzdy júrgizbeısiz?» deıtin. Al men qysylyp, uıalyp júrdim. Sol qyzymnyń qoldaýymen blogerlikke jol bastadym. Qudaıǵa shúkir, oqyrmandarym kóp. 2 aıdyń ishinde 20 myńǵa jýyq adam jazyldy. Kóshede kezdeskende de meni qoldap, qolpashtap otyrady. Raqmetterin aıtady. Sonyń ózi men úshin qýanysh syılaıdy, — deıdi bloger Jibek Joly telearnasynyń «Búgin LIVE» baǵdarlamasyna bergen onlaın suhbatynda.

Zámzágúl Nurtaeva óziniń as úıde júrip jınaǵan tájirıbesin oqyrmandarymen bólisedi.

— Qazir úıde otyrǵannan keıin blogymdy mal sharýashylyǵy men aspazdyq baǵytynda júrgizemin. Qolymnan keletin nárseniń bárin salamyn. Ol — ózimniń kúndelikti kúıbeń tirligim. Ómir boıy as úıde júrip jıǵan tájirıbemdi qazir kórermenniń nazaryna usynyp jatyrmyn. Erekshe sezimdemin. Vıdeolardyń bárin qyzym túsiredi. Ózi bastan-aıaq kómektesedi, — deıdi ol.

60-qa taıaǵan shaǵynda jańa is bastaǵan Zámzágúl apany alǵashynda týystary túsinbepti.

— Týǵan-týysqandarym basynda «Qalaı bloger boldyń?» dep kúldi. Arasynda qoldaýshylar da boldy. Qyzym mektepten «Mama, seni synyptyń balalary aıtyp jatyr. Anańyz bloger bolypty ǵoı», — dep qýanyp keledi. Balalarymnyń qýanǵanynyń ózi — úlken jetistik, — deıdi Zámzágúl Nurtaeva.

Keıipkerimiz blogynda áli kúnge enesimen birge turatynyn aıtqan. Eki aradaǵy syılastyqty saqtaý úshin sabyrlyq kerek deıdi ol.

— Enemmen birge turǵanyma 30 jyldan asty. Eń birinshi aıtarym — sabyrlyq pen tózimdilik kerek. Kúnige enemniń jaǵdaıyn jasap, tańerteńnen tamaǵyn beremin. Ol kisi — meniń syrlasym, aqylshym, tipti qurbyma aınalyp ketti. Bilmegenderimdi enemnen surap otyramyn, ol da bar bilgenimen bólisip, baǵyt-baǵdar berip otyrady. Enemdi qatty jaqsy kóremin, — deıdi bloger.

Aq jaýlyqty ana qazaqstandyqtardy Qarttar kúnimen quttyqtady.

— Qarttar kúni qutty bolsyn! Ózimniń anam da 90 jasta. Al qolymdaǵy enem — 80 jasta. Aq jaýlyqty analarymyz aman, denderi saý bolsyn. Aspanymyz ashyq, zamanymyz tynysh bolsyn, — dep túıindedi ana.

Aıta keteıik, Búgin álem Qarttar kúni merekesin atap ótip jatyr. Merekege oraı elimizde qarttardy áleýmettik qoldaý sharalary qarastyrylǵan.