2 aı ýaqyt bar: azamattar qalaǵan emhanaǵa tirkele alady
ASTANA. KAZINFORM – 15 qyrkúıekten 15 qarashaǵa deıin elde medıtsınalyq uıymdarǵa tirkeý naýqany ótedi. Bul týraly Ulttyq aqparattyq tehnologııalar baspasóz qyzmetihabarlady.
— Osy kezeńde azamattar óz emhanasyn aýystyrýǵa múmkindik alady. Bul rásimdi tolyqtaı onlaın rejımde — eGov.kz portaly nemese eGov Mobile mobıldi qosymshasy arqyly, medıtsınalyq uıymǵa barmaı-aq oryndaýǵa bolady.
Qyzmet emhanaǵa tirkelip, ýchaskelik dárigerdi tańdaýǵa múmkindik beredi. Tańdalǵan dárigerge sáıkes medıtsınalyq qyzmet kórsetý aýmaǵy júıede avtomatty túrde kórsetiledi. Naýqan qorytyndylary kelesi kúntizbelik jyldyń 1 qańtarynan bastap kúshine enedi. Aldyńǵy uıymnan tirkeýden shyǵarý jańa ótinim rastalǵannan keıin avtomatty túrde júzege asyrylady, — delingen habarlamada.
Naýqannan tys ýaqytta da emhanany aýystyrýǵa bolady. Bul basqa eldi mekenge qonys aýdarǵanda, jumys nemese oqý ornyn aýystyrǵanda, sondaı-aq emhana qaıta uıymdastyrylǵan nemese jabylǵan jaǵdaıda múmkin. Mundaı jaǵdaıda qyzmetti jylyna bir ret qoldanýǵa bolady.
Qyzmetti eGov.kz portalynda paıdalaný úshin:
- eGov.kz portalynda avtorızatsııadan ótip, «Densaýlyq saqtaý» bólimin ashý qajet;
- «Polıklınıkaǵa tirkelý» qyzmetin tańdap, qajetti óristerdi toltyrý qajet;
- ótinimge qoljetimdi qol qoıý ádisteriniń birimen qol qoıý qajet;
- «Kórsetilgen qyzmetter tarıhy» bóliminde belgilengen ýaqyt ishinde ótinimdi óńdeý týraly habarlamamen tanysýǵa bolady.
Qyzmetti eGov Mobile qosymshasynda paıdalaný úshin:
- eGov Mobile qosymshasynda avtorızatsııadan ótip, «eGov memlekettik qyzmetteri» — «Densaýlyq saqtaý» bólimine ótý qajet;
- «Medıtsınalyq-sanıtarııalyq alǵashqy kómek kórsetetin medıtsınalyq uıymǵa bekitý» qyzmetin tańdap, qajetti derekterdi engizý qajet;
- qyzmetti qoljetimdi qol qoıý ádisteriniń birimen rastaý qajet;
- ótinimniń óńdelý mártebesin «Qyzmetter tarıhy» bóliminen qadaǵalaýǵa bolady.
Qyzmettiń joǵary suranysqa ıe ekenin statıstıka da dáleldeıdi. 2024 jyly tirkelý qyzmetin 3,6 mln-nan astam ret paıdalandy: olardyń 2 905 013-i eGov.kz portalynda, 722 198-i eGov Mobile qosymshasynda rásimdeldi. 2025 jyly (shilde aıyna deıin) portal arqyly 1 135 628, al mobıldi qosymsha arqyly 1 046 354 ótinim qabyldandy.
Ádettegideı eń joǵary belsendilik naýqan kezeńinde baıqalady. Máselen, 2024 jyly qyrkúıekte — 495 myń, qazanda — 502 myń, qarashada — 159 myń ótinim tirkelgen.
Eske salamyz, qyzmet arqyly kámeletke tolmaǵan balalardy jáne 18 jastan asqan áreketke qabiletsiz dep tanylǵan azamattardy olardyń qamqorshylary onlaın túrde polıklınıkaǵa tirkeı alady.
Eske salsaq Qazaqstanda dárigerler tapshylyǵy 19%-ǵa qysqarǵan edi.