№2 Aqmola oblystyq aýrýhanasynda ınsýlt ortalyǵy ashyldy
KÓKShETAÝ.QazAqparat - Astana qalasyndaǵy №2 Aqmola oblystyq aýrýhanasynda ınsýlt ortalyǵy ashyldy, dep habarlaıdy QazAqparat tilshisi.
Búgin Astana qalasyna jumys saparymen barǵan aımaq basshysy Məlik Myrzalın atalmysh ortalyq ashylǵan №2 Aqmola oblystyq aýrýhanasynyń jumysymen tanysty.
Aqmola oblysynyń densaýlyq saqtaý basqarmasy baspasóz qyzmetiniń málimeti boıynsha, ortalyqty qajetti medıtsınalyq quraldarmen jabdyqtaý úshin oblystyq bıýdjetten qarjy bólingen. Aǵymdaǵy jyldyń 9 aıynda aýrýhanaǵa nevrologııalyq aýrýǵa shaldyqqan 233 naýqas túsken. Onyń 74 ınsýltpen aýyratyndar.
«Ortalyqta Astana mańyndaǵy Tselınograd, Astrahan, Arshaly, Ereımentaý, Egindikól, Qorǵaljyn jəne Shortandy aýdandarynyń turǵyndary emdeledi», - dep atap ótti baspasóz qyzmetindegiler.
15 orynǵa arnalǵan ortalyqtyń qajetti dıagnostıkalyq jabdyǵy, sonyń ishinde dárigerlerdiń ınsýlttyń túrin jáne emdeý tásilin anyqtaı alýyna kómektesetin kompıýterlik tomograf bar. Ortalyqta jumys isteý úshin anestezıolog-reanımatolog, nevropatolog, terapevt, sáýlelik jáne fýnktsıonaldyq dıagnostıka, fızıoterapııa jáne emdik dene tárbıesi dárigerleri oqytýdan ótti. Emdelýshilerdi ońaltý úshin quramynda emdik dene tárbıesi, logoped, psıholog dáriger jáne nusqaýshy bar erekshe kópsalaly brıgada qurylǵan.
«Jańa ortalyqtyń ashylýyna oraı emdelýshiler shuǵyl túrde qajetti kómek ala alady. Naýqastardy qalypqa keltirý de ortalyqtaǵy mańyzdy faktor bolady, ony aýrý bastalǵannan keıin úshinshi, besinshi kún aralyǵynda ótkizedi. Búgin Ortalyq birinshi emdelýshilerin qabyldaýda», - delingen habarlamada.
Aıta keteıik, bul oblysta ashylyp otyrǵan 3-shi ınsýlt ortalyǵy. Osyndaı ortalyq Kókshetaýdaǵy Aqmola oblystyq aýrýhanasy jəne Stepnogor qalasynyń ortalyq aýrýhanasynda jumys isteıdi.
Oǵan qosa, jyl sońyna deıin Atbasar qalasynda ashý josparlanǵan.
