2 adam aýrýhanada: Aqtóbede kólik urlap, polıtsııadan qashqan kúdikti jol apatyna tústi
AQTÓBE. KAZINFORM – Aqtóbede kólikti aıdap ketken kúdiktiler polıtsııany kórip, qasha jóneledi. Jol erejesin buzǵan júrgizýshi ózge kólikke soqtyǵysyp, órt shyqty. Saldarynan eki adam aýrýhanaǵa tústi.
Oqıǵa keshe Aqtóbe qalasyndaǵy Keńes Nokın dańǵylynda boldy. Oblystyq PD baspasóz qyzmetiniń habarlaýynsha, saýda úıiniń biriniń avtoturaǵynan Daewoo Nexia avtokóligi urlandy. Keıin patrýldik polıtsııa urlanǵan kólikti baıqap, toqtaýyn talap etken. Alaıda júrgizýshi baǵynbaı, jyldamdyqty asyryp, qasha jóneledi.
– Іzge túsý kezinde kúdiktiler Keńes Nokın dańǵylynda qarsy jolaqqa shyǵyp, VAZ avtokóligimen betpe-bet soqtyǵysqan. Apat saldarynan eki avtokólikten de órt shyqqan. Jol-kólik oqıǵasynan VAZ avtokóliginiń júrgizýshisi men jolaýshysy aýrýhanaǵa jatqyzyldy. Eki kúdikti ustalyp, polıtsııa bólimine jetkizildi. Kólikti zańsyz aıdap áketý faktisi boıynsha sotqa deıingi tergep-tekserý bastaldy, - dep habarlady oblystyq PD baspasóz qyzmeti.
Aıta keteıik, Aqtóbede tek retseptpen satylatyn dári men psıhotropty zattardy zańsyz satqan eki kúdikti ustaldy. Olardan aqsha men dári-dármek tárkilendi.