2,7 mıllıonnan astam adamǵa áleýmettik tólem taǵaıyndaldy

NUR-SULTAN. QazAqparat - 2,7 mıllıonnan astam adamǵa tótenshe jaǵdaı kezinde tabysynan aıyrylýyna baılanysty Memlekettik áleýmettik saqtandyrý qorynan tólem taǵaıyndaldy, dep habarlaıdy QazAqparat.

«2 mln 708 myń 666 adamǵa TJ kezeńinde tabysynan aıyrylýyna baılanysty Memlekettik áleýmettik saqtandyrý qorynan (MÁSQ) áleýmettik tólem taǵaıyndaldy. 15 sáýirdegi saǵat 15:00-degi jaǵdaı boıynsha TJ kezeńinde tabysynan aıyrylýyna baılanysty áleýmettik tólem taǵaıyndaý úshin 5 mln 334 myń 224 azamattan barlyǵy 6 mln 837 myń 393 ótinish kelip tústi. Osylaısha, 1 mln 503 myń 169 qaıtalanatyn ótinim tirkeldi», - delingen QR Eńbek jáne halyqty áleýmettik qorǵaý mınıstrligi málimetinde.

Biregeı ótinishterdiń eń kóp sany: Almaty oblysy – 667 116; Almaty qalasy – 651 903; Túrkistan oblysy – 631 598; Nur-Sultan qalasy – 418 768; Shymkent qalasy – 339 709.

Óńirler boıynsha kelesi oblystardyń turǵyndaryna járdemaqy eń kóp taǵaıyndalǵan: Almaty oblysy – 411 573; Túrkistan oblysy – 300 996; Almaty qalasy – 291 439.

«Derekterdi tekserý jáne ótinishti qaraý merzimi 3 jumys kúnin quraıdy. Ótinishterdi qaraý merzimderiniń ulǵaıýyna jol bermeý maqsatynda azamattardan ótinishti bir ret berýlerińizdi suraımyz. MÁSQ-ta tólem jasaý týraly sheshim qabyldanǵannan keıin ótinish berýshige SMS-habarlama keledi. Keıinnen ótinish berýshiniń derekteri «Azamattarǵa arnalǵan úkimet» memlekettik korporatsııasy» KEAQ-ǵa jiberiledi, ol ony ekinshi deńgeıdegi bankterge tólem júrgizý úshin jiberedi», - dep atalyp ótken habarlamada.

Áleýmettik tólem alýǵa ótinimdi eGov portaly, 42500.enbek.kz veb-saıty jáne https://t.me/Help42500Bot adresi boıynsha Telegram-bot arqyly berýge bolady.