2,5 myńnan astam áleýmettik nysandardan 16 myńnan astam órt qaýipsizdigi erejelerin buzýshylyq anyqtaldy - V. Bojko
ASTANA. Jeltoqsannyń 14-i. QazAqparat /Qanat Mámetqazyuly/ - Aǵymdaǵy jyl basynan beri elimizdiń 2,5 myńnan astam áleýmettik nysandarynan 16 myńnan astam órt qaýipsizdigi erejelerin buzýshylyq anyqtaldy.
Búgin QR Parlamenti Májilisinde ótken Úkimet saǵatynda QR Tótenshe jaǵdaılar mınıstri Vladımır Bojko osylaı málim etti, dep habarlaıdy QazAqparat.
«Aǵymdaǵy jyl basynan beri mınıstrliktiń jedel qyzmetterimen 54 myń 13 apattyq-qutqarýǵa shyǵý sharalary júzege asyp, 6 myń 392 adam qutqaryldy jáne tótenshe jaǵdaı aýmaǵynan 4 myń 419 adam oqshaýlandyrylyp, 942 zardap shegýshige alǵashqy medıtsınalyq járdem kórsetildi. Tótenshe jaǵdaılar jónindegi memlekettik baqylaý komıtetterimen óndiristik jáne órt qaýipsizdigin qamtamasyz etý máseleleri boıynsha qosymsha sharalary qabyldandy. Órt qaýpi týyndaıtyn jaǵdaıdaǵy nemese adamdarǵa naqty qater tóndiretin 8,5 myńnan astam nysandardyń qyzmeti toqtatyldy. Ákimshilik jaýapkershilikke 40 myńnan astam adam tartyldy. Óndiristik jáne órt qaýipsizdigi normalaryn óreskel buzǵan kinálilerge 282 mln. teńgeden astam aıyppul salyndy», dedi V. Bojko.
Mınıstrdiń aıýtynsha, aǵymdaǵy jylǵy tekserýler barysynda bilim berý jáne densaýlyq saqtaý nysandaryndaǵy órt qaýipsizdigine basa nazar aýdarylǵan. Máselen, mınıstrlik tarapynan júrgizilgen tekserýlerdiń nátıjesinde, aǵymdaǵy jyly 2,5 myńnan astam áleýmettik nysandardan 16 myńnan astam órt qaýipsizdigi erejelerin buzýshylyq anyqtalǵan. «Bul rette ákimshilik jaýapkershilikke 1 myń 438 jaýapty tulǵa tartyldy. Olardyń arasynda 1 myń 331 tulǵaǵa 8 mln. 387 myń teńgeniń aıyppul sanktsııalary berildi. Nysandardyń jumysyn toqtatýǵa arnalǵan 93 ótinish aýdanaralyq ekonomıkalyq sottarǵa joldandy», dedi mınıstr.
