2,5 myńǵa jýyq qazaqstandyq búırek aýystyrýǵa muqtaj - dáriger
ALMATY. QazAqparat - Almatyda 2011-2016 jyldar kezeńinde óz organynyń bóligin erikti túrde syılaǵan donorlardy marapattady, dep habarlady «QazAqparat» HAA tilshisi.
Sharaǵa donor men retsıpıent retinde baýyr aýystyrǵan 80-ge jýyq adam qatysty. Olar «Baýyrymdy baýyryma syılaımyn» medalimen marapattaldy. A.N. Syzǵanov atyndaǵy Ulttyq ǵylymı hırýrgııa ortalyǵynyń mamandary ázirlegen medalmen adam ómirin uzartýǵa ólsheýsiz úles qosqan jandar marapattaldy.
Syzǵanov atyndaǵy Ulttyq ǵylymı hırýrgııa ortalyǵy basqarmasynyń tóraǵasy, Almatynyń bas transplantology Bolatbek Baımahanov qazir Qazaqstanda 5 myńnan astam naýqas dıalızde ekenin, onyń 2,5 - myńǵa jýyǵy búırek aýystyrýǵa muqtaj ekenin aıtty. Taǵy 500-ge jýyq adam baýyr aýystyrýǵa, 45-50-ge jýyǵy júrek aýystyrýǵa muqtaj.
Sondaı-aq baýyr aýystyrý - júrgizilip jatqan otalardyń ishindegi eń kúrdelisi ekenin túsindirdi.
«Baýyr - qantúzý organy. Ota qan joǵaltpaı, asqyndyryp almaı jasalýy qajet. Keıinnen onyń densaýlyq jaǵdaıyna keri áseri bolmaýy qajet. Tek 30 paıyz baýyr retspıentte qalady, ol dene kólemine jetkilikti bolýy tıis. Baýyr jetimsizdigimen problemalar bolmaý úshin ár donorǵa 60-70-ke jýyq zertteý júrgiziledi», - dedi maman.
«Jaraqattan 30 myńǵa jýyq adam qaza bolady, onyń 3 myńy baýyr jaraqatynan. Adamdar, komanda jetkilikti joǵary deńgeıde ota jasaýǵa ázir. Memleket - dári-dármekpen qamtamasyz etedi. Qoǵam bunyń mańyzdy ekenin túsinýi qajet», - dep qosty ol. 
